Angatetter amai saka mangatet !

Tang yabo joko ita ana tashi tashidak mena tsübuba agi mapa kecha meinyak kidang amonger asünungji, asenoki Corona virus ajanga bener arutsüba Covid-19 tashidak ya kechi, koma shiranger aser koma nokdangtsüla ta asüba tetuyuba aser inyakyim karbo kanga junga meteta kümogo. Ibayongji, kanga nüngdak ka mesüra kima yimdongia maor, tangar kidangia maor aser tangartema asenok kidangi marur. Ano, yimdong nung senzüdanga nisung ajak teni tebang nembanger senzür aser merükmejua tangsa merükmeju tasüba kümogo. Ajisüaka, ano inyakyim aika nung asenok ya angateter mangatet ama inyaksangshiba angur. Asenoki aiben, tang government ozüng agi kechalenia moudaktsü amongba ya akhi mapang nübortem longkak aita mokdangba amato bilemer, ibayongji aika kanga kümdanga liaka, ano ano nisung aika kanga mekümdangi teni tebanga dena menembang ‘volunteer’ mapa inyaka senzüba angur. Ashiko, aikati ‘kecha masü nung, ta zübazübaa bilema alitsüa akok saka kecha masü nung ta bilemba agi, Italy nung asenoki parnok senso tajung remer merema asüba nguogo aser tang US nung atalokdagi. Iba tashidak mesen ya tenük agi mangur aser menali shiranger masü saka anogo ter metsü tashi nungang shiranga aitba metetter. Iba ama tashidak memenatsü asoshi kümdangdaktsür asünungji, asenok rongnunga menatepa aser nungtepa masü saka nisung o nisung na tsüngdaa am kashibo tetsüngda ittepa amentsü aser nokdaktsü ajungshir. Ajisüaka, ano asenok aikati angatetter mangatet ama inyakbatem rongnung, talisa, lokti tentet aser yimten lenirtem aika lir. Item jagi nübortem meimba agi pei nübo, rongsen aser shisatsü ajak bendanga agüja tesem ajaklen nübortem yaria jajar. Ajisüaka, parnok aikati tetsüng teben ajak meyibanga süoshi (PPE) agir nübortem ajurua jembitsü melen tenitebanga menembang ser tangar den menoktepa oagi shilem agiba angur. Ano, lenjem lenjem nung volunteer-tem PPE magi ser nisungtem oli aruli ta ser ajak soita jembia mitba angur. Parnokibo yimkong tashidak nungi kümzüka ayutsü asoshi inyaker saka aji angatetter mangatet inyaker, kechiyong parnoki mitba nisungtem rongnungji ka dak danga covid19 tashidak keta lira, ibaji memeteti volunteer-tem dakji menalokogo ta asenoki angatetdi aser parnoki itemji kidangi bener arutsü. Atangji, iba tashidak mesen nokdangtsü asoshi asenoki sü agi tenitebang nembanger saka temetettertemi ashiba agi, asenok teni tebang nembanger liaka asenoki ajuruba, jembiba, kongshiba aser mitba nisung dakji iba tashidak mesen keta lira, aser pa mesüra laji teni tebang menembangi lira, iba mesenji asen dak menaloktsü melamelar. Tetezü asen kija teni tebang nembangba kisüng agibo asenok mekümzüktetter. Iba ama tekümdangtsü aika mapa küma inyaktsü ajungshitepba mapang ka nung, ano state government nung ketdangsertemi iba tashidak nokdangba mapa nung tangalen nungi arurtem agizüka anepalutsü asoshi lokti tentettem dang volunteers meshibaji angatetter amai saka mangatet inyakba lendong mapa ka asütsü. Tatishitsü ka, Delhi nungi train nung nisung khen arudang nisung meyirijang ta arutsü aser itemji railway station nung ataa lir agizüka quarantine center bushia oagi anioktsütsü ta asüba mapatem, kecha training magütsüba aser PPE a magi ser mask kija agir volunteer-tem nem inyakdaktsütsübaji lendong mapa lir. Item jagi, ashiko, memeteti tashidak menar pei kidangi bener aotsü. Iba jagi Covid19 anema inyakertem, mozü kidang inyakertem asütsüa akok mesüra sepaitem asütsüa akok mesüra training agir alir Red Cross purtem asütsüa akok, parnokjibo, pei kinungertem dak tashidak menaloktsü tsübuba agi, pei kidangia moi tesem balaka nung government-i anepalua mongdaktsür. Ashiko, asenokbo tasü tait aser tongmelangji, teka tazüng, kecha maben asüyonga rarai odi asütsü saka nokinkeketer asüyonga nok nü mabenbo tongpangi maor. Iba tangatetba nung lenirtemi anir nübortem ajaki tim benshitsüyimbo benshia anidaktsüla aser government-ia tapi agi, tanga tongpang ama bilema, nübortem dang volunteer arung ta mashitsüla.