Danga state nungi Darogapathar-i arur dang metetdaktsür

Dimapur, Monupii/May 15 (TYO): Novel coronavirus tashidak wara nungi jenbua alitsü aser iba tashidak prokshiba nokdangtsü mechi ita ka ser tesadang shi linük tesem ajungalen shibangba ajanga kaketshir, mapa inyaker aser shilo-manemertem kidangi meyipa shilangtsü kanga yongyatepba mapang ka lir. Iba dak sendakba maparen nung Darogapathar yimtsüngi arutsüpur atema Darogapathar village council ajanga teinyaktsü kar metetdaktsüogo.
Nagaland state alema orr maruteti alirtem dang tajemba agi ita ana tang pei talidak ataa alitsü aser COVID-19 maliba tesem ka südaktsütsü asoshi Nagaland state atema shilem agitsü mepishir. Na arutsüba sentong ya nü temang atema lendong aser kidang nai meima aliba nisungtem atema lendong asütsü, ta Darogapathar village council sangdong ka ajanga ashi.
Mepaitoktetba tensa kar ajanga na state-i meyipa arutsüsa kümra, yimtsüngi arurtemi council nem kinunger ajanga osang sangoktsütsüla aser Dimapur atongba den külemi screening facility centre nung temang tendanger sorkari shimteta aliba quarantine facility nung anogo 14 ayutsü, iba sülen tejangja ketdangser nungi nüdak iba tashidak maliba kuli tejangja agütsütetba sülen ang yimtsüngi aitdaktsütsü melatsü, ta ashi.
Village council ajangasa, arutsü aliba kinungertem dang pei kinunger adianutem mapang tatsüba anempongtsü/quarantine atema council dang masüngdangtsüla, kechiaser yimtsüng nung aliba nüburtem taküm kümzüka ayutsü ya council indang tongtipang teinyaktsü lir.
Tang aliba tesem nungi state-i marui atatsü molungteter nem senotsü teyari shidak agütsütsü asoshi Darogapathar village council-isa Nagaland sorkar dang mepishiogo.