DC, Dimapur-i makamaiter nem mask lema agütsü

Deputy Commissioner, Dimapur, Anoop Kinchi IAS-i May 15, 2020 nü GS Road, Dimapur nung migrant worker/makamaiter nem shidoktsü akokba cotton mask lema agütsüdang tangokba noksa ka yangi angur.

Dimapur, Monupii/May 15 (TYO): Nüburtem nem mask agiba koda tongtipang, iba indang tali awajema metetdaktsütsü mechi Deputy Commissioner, Dimapur, Anoop Kinchi IAS-i Dimapur yimti nung tesem balala nungi mapa inyaktsü arua alir aser makamaiter nem May 15, 2020 nü shidoktsü akokba mask tem tsüngdong oa lema agütsüogo.
Tashidak wara nungi jenbua alitsü mechi mask ya ajaki agitsüsa kümogo, ajisüaka makamaiter aser teyari nüngdaka alibapur aser tesem balala nung aayanga jajartemi anogoshi layer asem aliba mask malitetu kümogo. Tanü DC, Dimapur-i shidoktsü akokba cotton agi yangluba mask lema agütsüba ya makamaiter aser tesem balala nung mapa inyaka jajartem asoshi temoatsü ka liasü, kechiaser parnoki iba ya küm ka bosa amshitettsü.
Maneni DC, Dimapur sülen osang balala sangdonger anidaka teka müreka ayuba aser social distancing indang nüburem nem awajema metetdaktsüja nüburtem dang tsüngdong oa ashi.
DC, Dimapur, Anoop Kinchi-isa iba campaign akok tashi inyaktsü ta ashi aser virus nungi pila alitsü asoshi tongtipangtiba mera asemji mask amshitsü, teka müreka ayutsü aser social distancing ya lir, ta ashi.
Paisa dokan kar tsüngdong oa semdanga nokdanga aliba moko ayoker asü masü ta tendanga jaja.