Delhi nung Naga nunger ka asü

Dimapur, May 15, 2020 (TYO) : Nagaland nungi cancer agi shiranga taneptsü bushii aoba nisung ka tenüng agi Imtoba Delhi nung Army Hospital ka nung anepalua lia yakonung May 13, 2020 aonung 9:00 ako shi alima nung pilaogo. Pa ya Assam Regiment nung sepai mapa inyaka liasü. Pa arishi küm 38 liasü.
Angazükba agi, taoba ita nungi pa shiranga amongba mozü kidangji shiranga aruba nisung ka dak Covid-19 tashidak putet, anungji iba sülenbo taoba anogo 25 tashi iba mozü kidang jagi asür Imtoba kinungtsü dena marudaktsüi Army doctor-tem jagi dang anepalua liasü.
Parnok anepaludak mozü kidang Covid 19 tashidak keta aliba putetba sülen, yangji alirtem ajak dak Covid 19 tashidakji tendang aser asür Imtoba daka asemben tendangba nung anabenbo iba tashidak mali asü ta angazüker. Ibayongji, pa asübaji Covid 19 agi asü asü mesüra cancer tashidakji mekokteti asüar mejangjateter.
Pa yakonung süaka, pa asüba osangjibo yashiang May 14 nü ang metetdaktsü aser Covid 19 tashidak agi asüba yimya nung shinga tonga marudaktsüi dang Brar Square Army Cantonment nung sepaitemi dang sentong ka agir parnok mang arongdak oagi, kinungtsüi ashiba ama Hindu yimsü nung masü saka electric tashi agi rongdokogo.
Pa tasümang anasai marudaktsüaka, oji nungi pa kinungtsüi sarasademer pa mangji sepaitemi bener ao.