Christian Forum Dimapur-i COVID-19 campaign tenzüker

Dimapur, May 15 (TYO): May 15, 2020 nü Christian Forum Dimapur (CFD)-i COVID-19 campaign tenzükogo.
Iba sentong nung Agriculture Production Commissioner aser Dimapur COVID incharge, Y. Kikheto Sema IAS, Deputy Commissioner, Anoop Kinchi IAS, Commissioner Police Rothihu Tetseo IPS aser Dimapur CMO, Dr. Tiasunep Pongener nungertem aden.
CFD Chairman, Rev. Moses Murry-i tesentepertem pela agizüka jembidang “asenoki tenük agi manguba virus ka den rarar, anungji asenoki Tsüngrem dak tamang yur raratsüla. Iba ama tensa ka nung Tsüngremi ajak azüoka alir aser Pa asenok den lir” ta ashi.
Assam nung nisung aika dak COVID putetba atema tebilemtsü bena Rev Moses-isa ketdangsertem dang arrtsü kanga junga anüktsü mepishi.
Tanü Y Kikheto Sema-i campaign lapokja COVID-19 stickers aser mask 50,000 sayatsü.
“Sorkari arogotem indang kiojen amshitsü atema arogo lennirtemi senden amentsüla. Tangalen nungi arurtem anenzükdaktsütsü atema arogo rest house tem nüngdaker. Tatem nung sorkari arogotem dang teyari meshitsüsa akümtsü aser achiajemtsü aser tanga nüngdakbatem sorkari agütsütsü” ta Kikheto-i o jembidang ashi.
Sorkar yaria nija school aser college temi hostel amshitsü agütsüba atema tenüngsang agütsür. Maneni, Non Naga nunger (Marwari Jains, Agarwals aser tanga Samaj)-i pei pei nübortem yariba atema tetushi agütsür, ta paisa metetdaktsü.
Dimapur Deputy Commissioner, Anoop Kinchi IAS-ia o jembidang “teka metsüktsü, mask enoktsü aser nisung o nisung tsüngda tepila ayuba ajanga virus nungi jenbua alitsü. Anungji nisung ajaki item teinyaktsü asem inyaktsüla” ta ayongzük.
Nisung aika Dimapur-i arutsü saka asenok petsaprong masütsüla. Talisa, Commissioner Police Dimapur-i odd & even traffic inyakyim tenzükba atema tenüngsang agütsür, ta Dimapur DC-isa ashi.
Medical department aser Kikheto Sema lenisüba kübok Empowered Committee-i anibelem arema COVID 19 anema mapa inyakba atema tenüngsang agütsür. CFD, kaketshir teloktem, NGOs aser sendaktepa alir ajaki ka küma longjemer inyaker aser iba ajanga asenoki wara madak takok angutsü, ta Anoop Khinchi-isa metetdaktsü.
“Tamangba yimsü dak sendakba teloktemi nübortem dang petsaprong masütsü atema angatetdaktsütsüla aser sarasadem teyari agütsütsüla” ta CP Dimapur Rothihu Tetseo-ia ashi.
Tangalen nungi arur aika achiajem shitak mengui anibelemer arutsü aser idangji arogoi tanüla tsütsü taneptsü agütsüba ajanga parnok anisüngzük angutsü, ta paisa tebilemba ka lemsatep.
Tamangba dak sendakba teloktem/arogotemi COVID19 agi asüba tasümang aremtsü atema renema alitsüla, ta Tetseo-isa shisem.
“Tenük agi manguba virus ya kodang arutsü’ar shingaia memetet. Anungji asenoki ozüng asem- mask enoktsü, teka merüka ayutsü aser nisung o nisung tsüngda tepila ayutsüba sülen anidaktsüla. Kin ajaki pei pei nübortem dang item ozüng ya angatetdaktsüra, eara tulu küma maotsü” ta CMO Dimapur, Dr Tiasunep-ia ashi.
Christian Forum Dimapur (CFD)-i COVID-19 anema tongti süa inyakertem aser nüngdakbapur nem mask 50000 agütsütsü. Parnokisa COVID 19 car stickers alemtsü, ta Rev Moses-i metetdaktsü.
Kohima Catholic Church nung Diocese, Bishop James Thoppil-i masks 25000 tenla agütsü.