Tsüraburtemi sayutsüba mapang

Tanü tensa yagi tsüraburtem nemang, ano, khuret talila ka bendenloktsüogo. Iba khuretji, joko, tsüraburtem ya kidang tanurtem taküm nüngdak peridaktsür school-i yoktsüba dang masü saka pei kidang tesayur kümer parnok dang lesson sayutsüsa kümogo. Atangji, kaketreju balaka lapoka yur anogo shia iba jagi zülutsü aser azüngtsü meyokyonga kidang tsüraburtemi sayutetra, tanur ka asoshi tangari zülua toktsübatem bushia angazüktsü asoshibo aji teperi. Ajisüaka, nisungji lokti taküm, anungji lokti nung alitsü angazüktsü tim asüba agi kaketreju lapoka yangji tanurtem adenshia shisarendaktsür, anungji kodang ano tensa mapang ya tajungba kümdir, akhi ama tanurtem ajak pei pei kaketreju nung oagi pei memdemertem den külemi mener tesayurtem nungi angazüktsü. Atangji, tanü ama kaketshidaki moutettsüsa kaketreju meshibangba mapanga, tsüraburtem aikati kidang tesayur kümer pei tanurtem sayutetba kibongtem aika lir. Aji oda, kaketrejui maodangyongi tanurtemi zülutsü aser azüngtsü metetbaji tsüraburtem mapa lir. Joko, tanübo tanurtem kaketrejui mao kidang nungi dang angazüker asünungji, tsüraburtemi parnoksasa kidangji tesayur kümer tanurtem dang mesayutetra, manger sangwa nung tanurtem takümji takoksa jenjang tulukati iadoktsü. Tsüngremi nisung nem agütsüba arishi ya tatsüka dang, anungji tanurtem kaketshiba mapang küm ka kaketrejui mao kazütsübaji talangka, iba jagi, joko, kaketreju shia nung tesayurtemi internet ajanga mopong nung tanurtem dangi lesson zülur yoker aser karibo ano ola adoka sayur, ano kaketreju kar nungbo tanurtem pei pei kidang mena yur pei tesayur den tejak o tejak na ngutepa aser ola angshitepa, külemi class takdang nung mener angazüker amai sayuba angazüker. Iba amaji asenoki tanga lima nung atalokba aser benshiba mapatem agi otsü küma jembia jembia tanübo asen ki tonga aruogo. Joko, kaketreju tonga mao tesayurtemi dang mopong nung yoker asünungji, itemji lessontemji agizüka azüngtsü aser angatsü atema tanur shia smart phone mesüra computer kaka nüngdaker. Aji oda, yashi kaketshirtem yangku nung longpak aser kakettem enoker kaketrejui aoba melena to tanübo smart phone ka lira ojang mesüra computer lira teperi. Atangji, iba temelenshiba inyakyim yagi sensakertem nembo tebilemtsü talila bener arutsür, kechiyong makamaitba agi smart mobile phone-a malitetba kibongtem aika lir, anungji parnok asoshibo desktop mesüra laptop computer alitsübaji tamakoktsü. Iba ama tiaji jet ta reprangteta government-i sensakertem yarii lenchii arutsüla aser ajak nem ta mesüaka sensaker tanurtem nembo computer-sa masüyonga smart phone kakabo agütsütsü kanga nüngdaka kümogo. Iba ama putu mapang ka nung meimlaika alitsü tenzükdang, kibong shia nung tsüraburtema tanü putu tanur aser lanur ama kümer, smart phone aser computer amshia tanurtem dang sayu ashitsübaji kanga nüngdak kümogo. Tanü putu yabo kenyongi akhi putu dang nungi balaka aser tajungba, kechiyong kaketshir ka atema memetetba ka asüngdangtsü asoshi temetetter kar bushia aotsü menüngdaker, kechiyong temetetnüba ajak computer nung enokja lir, anungji lesson tebushidak nunga mangatetba lira, computer nung google dang asüngdangtsü mesüra wekepedia nung reprangtsü. Ano, mekümdangi amshira, tanur ka taküm raksatsübajia smart phone mesüra computer nungjisa enokja lir. Ibayongji, tsüraburtemia smartphone aser computer amshiba yimyaji metettsü kanga nüngdaker, kechiyong metet nung dang sayutettsü. Joko, tanurtem den külemi tsüraburtema tangazüker akümtsüla. Nisung ajak atema angazüktsüba yabo temenu maka aser tatembanga maka, anungji tsüraburtemi joko tantsür tambur kümerji ta mebilemtsüla. Joko, mobile phone aser computer amshiba ya asenok sobaliba aser oshi kümogo, anungji asenoka iba sobalibaji meteta benshitsü aser iba oshiji jembitsüsa adoker. Iba amai kidang mongmonga asen chirtem o tangar chirtem na tepila talangka ittepba akümtsü. Kar kidang tsürabur den külem külemi lesson bushia angazükba agi tashitemeteter akümtsü aser kar kidangbo tsüraburtemi mesayutetba agi takidak maka kümadoktsü. Ibaji kidang sayur tesayurtem dang aket aser item tesayurtemji tsüraburtem lir.