Noklak Sub-Divisional Task Force senden menogo

Noklak, Monupii/May 21, 2020 (TYO): Noklak Additional Deputy Commissioner indang office nung Noklak Sub-Divisional Task Force against COVID-19 senden ka menogo. Iba senden nung Noklak ADC, M.Chaitanya Prasad, IAS mendenti liasü.
Iba senden agiba mapang, tanga tesem nungi lisopurtem shilangtsü tenzüker asünung, Quarantine Centre tem atema Managing Committee shima yutsütsü asoshi teloki telemtetba agi.
Noklak Sub-Divisional Task Force-i Quarantine centre asem – Danlepdong nung Model School Hostel, KGBV Hostel aser IAH Ayush Hospital Noklak den yipden 50 renemja lir. Item Quarantine Centre süsümedema achaayangtsü atema Arogo aser Lokti Tentet balala dang teyari meshitsü asoshi telok-i bangzüngtep.
Teloki-sa, tanga tesem nungi shilangertem District Hq Institution Facility tem nung mezüng Quarantine asütsü aser district facility Hq asüngba sülen parnok ya sub-division-i yoktsü asoshi tekolakpurtem dang mepishitsü telemtetba agiogo.
Kasa senden nung teloki, rongdak mapang amshitsü asoshi tekolakpurtem dang tejak nembangba mask 2000 aser PPE 50 agütsütsü asoshi mepishitsü bangzüngtep.
Shishilembaba aser dokan tem lapokba mapang asadanga, nüngdakba dokantem anepdang 7:00 ako nungi nikongdang 2:00 ako tashi lapokdaktsütsü asoshi senden nung telemtetba agia liasü.
Ajisüaka, COVID-19 dak sendakba nung nüngdakba meratem talisa lokti adenshiba nokdangtsü aser nisung ajaki tejak nembangba mask enoktsü asoshi tetuyuba anidaktsüla. Kasa mapang dokan kibur tem-ia mask meinok alir customer tem dang osettsüset mayoktsü asoshi tetuyuba agütsüogo.
Jila tesem nung nübur senzüsembongba timba akümba asadangtetba osang angazüka, nübur dang nüngdak melira kima yimdonglen mashi mesenzüi kidang kilong nung kazüktsü ajungshitsü asoshi sangdongtsü, ta senden nung teloki telemtetba agiogo.