Pei kümdang kümdangtsüla

Corona virus tashidak mesen tamajung ya nokdangaka makoker, anungji pei kümdang kümdanga alitsübaji mezüngbuba teinyaktsü kümogo. Atangji, iba tashidak agi shirangertema aika jungogo, anungji pei kümdang kümdanga anepalutetra kangabo tetsübutsüa mali. Ibayongji, joko World Health Organisation-i dena nisungtemi iba tashidak den külemi lia aotsü lenmang metettsübajiang tongtibangba kümogo ta sangdongogo. Iba tetezüji, iba tashidak ya ali jak nungi tangsabo mesamatsü aser taneptsü mozüa tangsabo mengutettsü, anungji komaser iba tashidak memenatsü ta teti bilema asenok inyaksangshi ajak nung benshitsübaji kanga nüngdak akümer. Mapang kabo alima nung ramen wara yaa tetsübutsü tashidak ka liasü. Mozüa maka aser anepalutsüa mashi ta maka aser memetetba agi alima nung nisung taküm aika samaogo. Atangji, tanüa ramen tashidak ya tetsübutsü tashidak lir, aji agi asenoki ramen tekoloki atuba otsüa angashir. Ajisüaka, tangbo ramen mozüa lir aser nisungtemi ramen tashidak kodaser memenatsü ta kümdanga alir. Tetezü alima nung ramen malia ta masü saka nisungtemi ramen memenai ramen den koma alitsü aji meteta lir. Ibayongji, ramen mena tsübuba agibo nisungtem kechalenia moi kidang mamonger mesüra ramen mena tsübuba agi teinyaktsü ka meinyaktetter ta masü saka ajak inyaker aser ajakleni aor. Aji oda, asenok ramen den külemi alir saka ramenbo memenar. Iba denji kasa alima nung tashidak aika lir saka asenok dak memenar, kechiyong asenoki parnok denji koda alitsü meteta lir. Iba amaji, tang nungi balaka, asenok atema caronavirus den külemi alitsü saka tashidakjibo memenatsü ta alitsübaji kanga tongtibang kümogo. Asenoki bilemdangtsü kaji, alima nung tashidaktem indang bushir mongintemi ashiba agi, iba Coronavirus tashidak, koba dang Covid 19 ta ajar, iba tashidak ya samatsü mapang agitsü ta ashir süra, iba tashidak ya mesama tashi asenok yamai kecha meinyak kidang dangbo monga melitettsü. Joko, ita ana shi asenok akhi alu mapa, office aser industries ajak shibanga yur kechalenia mao chiyonga amonger. Covid 19 tashidak mesen ya alima sünga aremzüyonga, asenoki yamai mapang talangkabo memongtettsü, kechiyong asenok kidang chiyongtsü makatsü aser nüngdak agi meperitsü, anungji ayazüka oa chiyongtsübosa bushitsüsa akümtsü. Asenok alima nung asangsang taküm mapatemji yamaji lir. Ibayongji, joko alima nung lenirtemia, asenok akhi mapa inyak tenzüktsüla, anungji iba tashidak ya memenai koda alitsü, iba libaliru yimyatemjiang metettsüla ta ajungshiteper. Tang tashi nungbo, iba tashidak memenai jenbua alitsü atema temetetertemi ashibaji lokti alidaki maotsü, tetezü nisung aika külemi sentepba sobaliba to malitsü, teti sü agi teni tebang nembanger senzütsü, teka temeyong agi teni tebang aser tenük nung mashi mekongshitsü, teti sapon aser hand wash mozü tzü agi teben shitokpet shidoka alitsü, yimdong nung asemba tsüngsem kidangi mebenkettsü, yimdong nung semer senzüba süoshi jet ta melener shitoktsü mesüra anü nung pudoktsü, yimdong nungi aruli tzü chigutsü, metsü mashi nung memetsütsü, sali moko machitsü, teti temang tashi itta alitsüsa süngolemba aser süngjanglijang dena chiyongtsü shitak achitsü, mapa tasak meinyakertema teti asentzü sendoka exercise agitsü ta tashidak mesenbo memenatsü saka asenokbo alima nung pei teinyaktsübo inyaka aotsü ta ali tenzüktsübaji kanga tongtibang kümogo. Atangji, tashidak mesen yabo tenük agi mangur asünungji, asen dak memenatsüsa asenok alitsübaji dang masü saka ano asenok dak keta alinunga, tangar dak memenaloktsütsüsa asenok kanga kümdanga alitsübaji kanga nüngdaker. Ibayongji, maginüyonga teni tebang nembanga mask agitsüsa akümer, teben o teben na ajeptepa salemner saka salemtsü majungshir, kanga meimer saka tantsür tambur aser temang manemi alirtem anasai maotsü ajungshir. Jungjunga bilemdangra, iba tashidak memenatsüsa alitsübaji tasakbo masü, kechiyong asenok mapaji asen temang aser asenok alidak merükmejua alitsü aser achiajem nung azüoktsü ta asüba sobaliba lir.