Anendaka aliba Naga nungertemi maneni tenüng züluoktsü akok

Dimapur, Monupii/May 21 (TYO): State nung COVID-19 tensa dak sendakba nung Minister, Planning & Coordination, Land Revenue and Parliamentary Affairs, Neiba Kronu-i ashiba agi, Naga nunger bendanglen anendaka alir aser state-i meyipa shilangtsü jangrartem, tang pei aliba tesem nung dang alitsü asoshi taoba mapang register mesüi alirtemi iamstranded.nagaland.gov.in portal nung register asütsü asoshi state sorkari maongka agütsütsü lemtetogo.
Pei sasa state-i marutsü molungteter nem sorkari khen atema teyari sen 10,000 agütsütsü. Iba dak sendakba nung kobi melie iamstranded.nagaland.gov.in portal nung tali tejangjaba angtsü, ta pai ashi.
Local Area Development Programme (LADP) fund atema Assembly Constituency shia sen lakh 150 lemzüktsüba nungi sen lakh 50 bo COVID-19 atema health infrastructure aser quarantine facility tajungba küma yanglushiba aser Agri allied sector kübok inyakyim balala nung amshitsü atema sorkari telemtetba agiogo, ta Minister Kronu-i ashi.
Quarantine facility nung timba agi sen lakh 10 tashi amshitsü aser Agri dak sendakba nung sen lakh 15 tashi amshitettsü. Sen lakh 50 nungi tanüngba sen ya health infrastructure tajungba küma yanglushiba nung amshitsü. Iba dak sendakba nung tejangja totuyubatem Planning Department ajanga agütsütsü, ta ashi.
Chennai nungi May 19, 2020 aonung 11:30 nung apusoba Shramik Special Train Number 06194 nung Naga nunger anendaka alir nisung 1325 bener May 22, 2020 nikongdang 1:05 ako nung Dimapur tonga arutsü, ta paisa ashi.
Anendaka alirtem Nagaland-i meyipa arurtem asoshi Special Economic Zone, Ganeshnagar, Dimapur District nung Institutional Quarantine Center amenoktsü asoshi state sorkari telemtetba agiogo. Iba dak sendakba nung DIG, Training, Chumukedima ya Quarantine Centre indang ‘overall in-charge’ asütsü aser pai quarantine Centre nung chiyingtsü, nüngdakba osettsüset aser logistic ajunga anepalutsü.
Bendanglen nungi Nagaland-i meyipa shilangertem asoshi atakteta aliba anempong mapang temaka parnok ward/colony-i aotsü nokdanga kija/lokti tentet kari totuyuba agütsüba osang angazükogo. Ano maneni sorkari ward/colony tem nung Quarantine Centre amenokba nunga tenokdangba agütsüba osang lir. Anungji iba dak sendakba nung State Sorkari Deputy Commissioner tem dang kija/lokti nem angatetdaktsütsü totuyuba agütsüogo, kechiaser iba amala mapa yagi nisung ka temeden rakzükba kija masü saka Sorkar totuyuba nung aibelenba lir.
Kija/lokti tentet balalai pei colony mesüra ward temi aittsü nokdangba mesüra Sorkari Quarantine Centre amenokba nung tenokdangba agütsür nem Epidemic Diseases Act, 1897 aser Disaster Management Act, 2005 kübok tapet temerenshi agütsütsüla, ta sangdong ajangasa ashi.
Tang tashinung state nungi coronavirus tashidak tendangtsü asoshi sample 1001 tokba nungi sample 978 indang osang aruogo aser ajak negative lir. Tanüngba sample 23 indang osang ano maru. Iba den külemi Truenat testing machine ajanga sample 27 tendangogo aser ajak negative liasü, ta Minister-isa ashi.