Tanü 12:00 ako nungi ayatirm tashi Dimapur nung dokantem shibangtsü

Dimapur, Monupii/May 21 (TYO): Alima ajunga sünga prokshia aliba COVID-19 tashidak wara aser novel coronavirus tashidak prokshiba azüoktsü mechi Disaster Management Act, 2005 nung shia aliba ama, May 22, 2020 nü anüngdang 12:00 ako nungi ayatirm tashi Dimapur jila nung retail shops/market kata melapokktsü. May 22, 2020 nü Chennai Central nungi Dimapur Railway station tonga special Shramik Train arutsü aliba mechi iba tetuyuba ya agütsür, koba nübur ajaki inyaktsüla, ta Deputy Commissioner, Dimapur, Anoop Khinchi, IAS ajanga asangdong ka nung metetdaktsü.
Special Shramik train nungya anendaka alir nisung 1400 dak tema mener Chennai nungi apusogo aser nikongdang 1:00 ako nung Dimapur Railway station atongtsü imlar. Iba train nung meyipa shilangertem ajak Agri Expo site, 4th Mile Dimapur nung aliba reception centre-i anir oa yangji inyakyim balala inyaktsü.
Maneni Commissioner of Police, Dimapur, Rothihu Tetseo IPS-ia sangdong ka nung, May 22, 2020 nü Chennai Central nungi anendaka alir nisungtem mena aliba Special Shramik Train ka nikongdang 1:00 ako nung Dimapur tonga arutsü sentong lir, anungji iba dak sendakba nung Dimapur jila nung gari senzüsempongba ajunga nokdangtsü, koba train arutsü ghonda ka lia benoktsü aser train arur ghonda pezü tashi alitsü, ta ashi.
Iba tenokdangba ya taoba mapang sangdongba nung nokdanga maliba garitem nema agütsür. Anungji nüburtem kümzüka alitsü mechi ajaki amalitep akatsü mepishir, ta Commissioner of Police, Dimapur sangdong ajangasa ashi