CM, Rio-i Covid-19 tendangtsü atema BSL-3 lab semzüktsüogo

Kohima, May 21, 2020 (TYO): Brihostibarnü Nagaland nung tang mezüng coronavirus tashidak tendangtsü atema Naga Hospital Authority Kohima (NHAK) nung Bio-safety Level (BSL)-3 Laboratory ka semzükogo.
Nagaland Chief Minister, Neiphiu Rio-i iba lab semzüktsüba sentong nungji Deputy CM, Y Patton, Speaker Sharingain Longkumer, cabinet minister tem, advisors aser Health & Family Welfare dept. nungi tongti ketdangsertem aser doctor tem dena liasü.
Iba sentong nung jembidang Rio-i, “Iba ya state nung health care delivery services nung, talisa state nung COVID-19 anema raraba nung alizüng ka tongtetba lir,” ta ashi.
“COVID-19 tashidak agi linük aika kongshiogo aser India nunga nisung lakh 1.12 dak iba tashidak putetogo, ajisüaka Tsüngrem taochi agi asen state nungbo coronavirus agi shiranger ka danga mali, anungji asenoki Tsüngrem nem tenüngsang agütsütsüla,” ta Rio-i ashi.
“Covid-19 tendangtsü atema melung malemba samples aika Assam aser Manipur state na dangi yoka arudar. Iba ama timtem tensa nung asenok yariba atema ni kidangser state tem aser sorkartem dang pelar,” ta pai ashi.
“Tanübo asenoki takok ngua item samples tendangtsü atema lab semzükogo, aser iba ya ajanga COVID-19 tendangba dang masü saka tanga virus aser tashidak balala research agiba nunga yaritsü,” ta paisa shisem.
State balala nung anendaka aliba Naga nungertem meyipa aru tenzükogo, ta shia pai, nisung 1,672 bo state tonga aruogo aser parnok ajak quarantine südar, ta metetdaktsü.
Train aser tayimtsü service tenzüka taonunga (Brihostibar aonung) aika arutsü aser maneni meyirjang aika arutsü, ta shia Rio-i, state sorkar indang iamstranded portal nung state-i meyipa aruner nisung 18,622-i tenüng agütsüogo, ta metetdaktsü.
Iba dak sendakba nung pai, “Asenoki parnok pelaa agizüker saka meyipa arur ajaki sorkar tetuyuba angaa quarantine facilities nung amongtsüla,” ta pai metetdaktsü.
BSL-3 lab ji asüng nungi amshi tenzüktsü aser iba dak sendakba nung osangbenertem den jembidang State Referral BSL-3 Lab nungi Research Scientist, Dr Joshua Keppen-i, PCL machine ana install süogo aser idakji anogoshia samples 90 tendangtettsü, ta metetdaktsü.