NPCC-i Rabomo Ngullie asükhu lemsatep

Dimapur, Aami/June 03 (TYO): DCCI, Wokha tir, Rabomo Ngullie asüba osang angashia ni kanga aoksar aser jashir, ta NPCC tir, K. Therie-i Rabomo kinungtsü, Jandeno Ngullie, tanur aser kinunger dangi züluba shidi ka nung shia lir.
Asür Rabomo Ngullie ya Wokha district nung Congress party atema manokshiba nokdang tajung ka liasü, shibai Congress Party maparen, tangatetba aser tesayuba wazüka ayutsü asoshi anibelem mesasai inyak. Jenjang balala nung timtem ajuruaka pa nem lemzüktsüba maparen ajak janga tasü ita aser shisa kaa inyak, ta NPCC tir-i ashi.
Nüburtem aser Party atema pa taküm alidang bendanga agütsür inyakba mapatem Congress party otsü nung teti alitsü aser nüburtem molungjang nung teti alitsü. Pai Party, Wokha District nung aliba nüburtem aser state atema shilem tali agitsü liasü, saka asen asoshi tia maka, Tsüngremi pa teti tatem maka anisüngzük daki anir ogo.
Pa iba lima nungi pilaba ajanga tazüng adokdaktsüba nembangtsü/melentsü makok. Ner kibong nungi medemdangtsü makokba takoksa ya Lotha nunger aser Wokha District nung alirtemi kija masü saka Congress kibong ajunga dak kongshir aser ner den külemi mang ayimer.
Na aser ner kinunger ajak den NPCC nung aliba züngsem ajaki mangyim tejashi lemsateper. Iba ama mangyim tejashi mapang Tsüngremi nenok ajak nem tashi tasen aser anisüngzük agüjang ta onoki sarasademtsür, ta NPCC tir-isa ashi.