Contractor Pele-i aluyimba nung temulung agüja inyakdar

Kohima, Aami/June 03 (TYO): Nagaland sorkari aluyimba ajanga state rongsenketsüng ajungkettsü asoshi ayongzükba dak ajemdaker Nagaland sorkar kübok züngoksema aliba contractor Pele Khezhie-i, Viphoma yimtsüng kübok Dzüdza ayong anasa ali acre 800 shi nung agri & allied maparen balala inyak tenzükogo.
Tang coronavirus tashidak pokteter aliba prokshia meyoktsü asoshi state mokdanger aliba ajanga tarutsü nung chiyongtsü agi anünga akümtsü ta angateta pai Viphoma yimtsüng nung alirtem anir alu ayim tenzüktsü asoshi telemtetba agi, ta Pele Khezie-i osangbenertem den par alu nung sensaksemba mapang ashi, shiba Contractors & Suppliers Union (NCSU) tir lir.
“Naga nunger tetsü teboutem aluyima taküm liyonga aru aser asenok tangar dak metaloker malitsü aser peisasa züsentetba agi peria alitsü asoshi aser state rongsenketsü ajungkettsü atema asen ali temo dangi meyiptsüla,” ta Khezhie-i ashi.
Maneni tang tensa mejungi akümba aser aluyimba dak alaka tanga inyakyimtem ajak anener aliba mapang, alu ayimba ajanga Naga nungertem nem lenla aika nung peisasa dak metaloker alitsü asoshi teyari agütsütsü, ta paisa ashi.
Khezhie-isa, Kohima district kübok Chiephobozou sub-division nung aliba Viphoma yimtsüng nung alirtem anir alu nung tsük prokogo.
Khezhie-i, par alu nung yakta ango aser ak metsü tenzüktsü asoshi sentong lir. Temetettsükaji Naga nunger yimtsüngtem nung yangtepba inyakba ya sobaliba inyakyim ka ama benshia arudar.