Dy. CM-i Bhandari aser Maratchu yimtsüng semdang

Dimapur, Aami/June 3 (TYO): Wokha district COVID-19 legislator in charge, Dy. CM aser BLP lenir Y. Patton-i June 3, 2020 nü Wokha district tenemtsüng nung aliba Bhandari Community Health Center aser Maratchu yimtsüng semdangogo.
Pai, Administration, police, healthworkers aser CSO tem den sensaksema osang tejangja agiogo. Pai ozüng azüokertem aser local loktitentettem dang, tang ataloka aliba tensa maongka agi, Assam arrtsü nung aliba Merapani len nungi temesepba mozü shibelenertem kanga kümdanga meita alitsü asoshi tetuyuba agütsüogo.
Lokti ajungtsü asoshi bendanga agüja inyakertem ajungshia Dy. CM-i CHC Bhandari, Maratchu Village Council, Maratchu Students Union aser LLRPO nem senotsü teyari agüja liasü. June 3 n anepdang Patton-isa, boots, gloves, masks aser hand sanitizers densema PPE tem DC Wokha nem agütsü, koba Nagaland Women Voluntary Association-i tenla agütsüba laisü. Dy. CM meina DC Wokha, SP, CMO, LSU ketdangpurtem aser BJP Wokha Unit tir-i anir lenirtemi item tesemtem semdanga liasü.