NDPP M&CC senden amen

Dimapur, June 3 (TYO): June 3, 2020 nü NDPP Media & Communication Committee züngsemtem Zoom Cloud Application amshia senden ka menogo.
Senden nung mendenji Secretary General, Abu Metha liasü aser Media & Communications Committee Spokesperson aser Convenor, Merentoshi den Sebastian Zumvu, T. L Merry aser tanga lennirtemi o jembi.
Iba senden nung COVID19 aser lockdown dak sendakba onüktem benoka lemsatep aser idangji Chief Minister, Neiphiu Rio aser Deputy CM, Y. Patton na lenisüba kübok PDA sorkari mapa tajung inyakba atema tenüngsang agütsü.
Parnokisa COVID-19 anema tongti süa rarartem aser sorkar department balalai mapa tajung inyakba atema pelaba metetdaktsü.
NDPP indang kongsang balalai tenüng agitsü atema masü saka nüngdakbapurtem yaritsü atema mapa tajung aika inyakba atema tanü senden nung pelaba lemsatep.