Nagaland nung nisung 58 dak COVID-19 puteta lir

Dimapur, June 3 (TYO): Bodbarnü Nagaland nung ano nisung 9 dak COVID-19 putetogo aser parnok züngsema nisung 58 jungogo.
“Sample 115 tendangdang Chennai nungi arur nisung 9 dak COVID-19 aliba putetogo” ta Bodbarnü Health & Family Welfare Minister, S Pangnyu Phom-i metetdaktsü.
Parnokji Dimapur nung 5 aser Kohima nung 4 lir, ta Health department ketdangser kati ashi.
Nisung 58 ji Dimapur nung 36, Kohima nung 17 aser Tuensang nung 5 lir.
Parnok ajak ya May 22 nü Chennai nungi Shramik Special train ajanga Nagaland-i arurtem lir.
Iba train nung Tamil Nadu kübok tesem balala nung anendaka alir nisung 1,328 mener aru.
Tang COVID hospital Dimapur nung nisung 36, Chedema COVID Hospital Kohima nung nisung 17 aser Tuensang COVID hospital nung nisung 5 anepaludar.
Tanü tashi nung sample 3,313 tendangba nungi sample 1,959 indang osang anguba nungi 58 positive putetogo, ta Principal Secretary Home-i tanü metetdaktsü.
Sample 1,354 indang osang ano mangu lir aser Facility Quarantine kübok nisung 4,110 mongdar.
Tang tashi nung Truenat testing machine ajanga sample 101 tendangba nung ajak negative putetogo.
Nagaland nungi tangalen anendaka alirtem pei pei talidak dang alitsü tenüng agütsür nisung 13,018 nem Rs 10,000 agütsüogo. Iba nung Rs. 13.018 crore endokogo, ta Principal Secretary Home-isa metetdaktsü.