NPP Nagaland unit nem NDPP-i telangzüba agütsü

Dimapur, Aami/June 8 (TYO): National People’s Party Nagaland state unit-i counter rejoinder agütsüba dak sendakba nung NDPP-ia telangzüba agütsüogo.
NDPP Media & Communication Committee sangdong ka ajanga ashiba agi, NDPP-i rejoinder agütsüba ya nisung ka democratic temeden nokdangtsü asoshi agütsüba masü, koba NPP puri tai angatetogo. Ken o ajanga iba political party ya parnok indang tanüla tsübur ama angateter aser maliba tesem nunga tanüla angur aser parnok amokmerenba angateta lokti ajungtsü asoshi külemi inyaker ta ashir! Tawa tashidak keta alir aika potetyonga aoba sülen sorkar kübok inyakertem pei anisüngzük toktsür iba tashidak den bendanga agüja rarar aser iba ya lokti asoshi mesera kechi mapa dang lisopurtem ajangzüktsü asoshi inyakba mapa ta ajatsü?
COVID-19 tashidak den raratsü asoshi aser taoba hopta ishika tsüngda tanga state nungi arur meyirejang aika anepalutsü asoshi sorkar tenzükertem aser yakbang nung inyakertemi tongpuapur inyakba NPP puri merprangtet südi, aser iba mapa asoshi tenüngsang magütsütet. Tenüngdakba resource tem peria meliaka sorkari tanga state nungi kidangi meyipa arurtem takok tashi tajungtiba anepalutsü meranga arudar. Kidangi meyipa arurtem aika süaka, lokti tentet balalai teyari agüja sorkari tang tashi nungbo parnok anendak, senzüsenpong aser health jenjang apir lemdangja parnok anepaluteta arudar. Mapang tatsüka tsüngda test facilities timba amenoktsü aser backlog kanga kümdanga achaayangtsü aser NPP densema khuret angatetba political party temi parnok tekolak lisem nung remer meimchir ajunga merenemi lia kongshiba tashidak pokteter aliba mapang, mapa tajung kechisa inyakteta odar item atema tenüngsang agütsü tenzüktsüla. Iba tashidak den raraba mapang anibelem mesasai inyakertem tezümedangdaktsüi state aser linük nung aliba senso tajung ajaki iba ya pei khuret ta angateta teyari agütsütsüla.
NPP MLA ana NDPP den longjemba dak sendakba nung NPP puri parnok sabanga aliba angateter. Taoba 26th Aonglengden assembly constituency parliamentary aser bye-elections mapang PDA-i election anaprongla nung PDA telongjem temaitsü parnok ajak longjemer shimba candidate yoktsü telemtetba agi. Taoba NPP state unit tir aser tang tir meden bener alisang teti tambosangi iba tenangzüktepba nung sign asü, ajisüaka PDA-i candidate sangdongtsüba mapang nungbo NPP puri tanga telemtetba ka agia parnok indang candidate yoktsü lemtet. Iba ajanga parnok indang MLA ana jenjang mejangjai aküm aser PDA pusemtsü asü parnok indang party candidate pusemtsü mejangjai kümadok, kechiyong tenaprongla PDA sorkar kübok Advisor kaka lir. Parnoki party dang candidate yoktsü asoshi telemtetba agiba asadangshitsü asoshi mepeshi, saka tenati ashiba manga, kechiyong election akoktsüba toktsür junga metokteptettsü ta meteta liaka parnoki tekok meranga liasü. Ibayongji MLA temi parnoksasa telemtetba ka agitsüsa aküm. Tanungba tatalokbatemjibo otsü dang lir aser nüburtemi party-i koda toktep aji jangjaa lir.
NDPP-i maneni lokti dang tang amala timtem mapang, state dang masü saka alima ajunga COVID-19 tashidak den raraba mapang katika dang tai tongloktsüba nungi pilaa alitsü mepeshia metetdaktsüogo. State sorkari tanga state nungi arurtem anepaluba den takok tashi rongsen aser nübu agi iba tashidak den raratsü merangdar. Asenoki tensa tamajungba mekümdaktsüi iba wara den raratsü asoshi anibelem mesasai, pei akokba tajungtiba agi inyakertem den teka amteper inyakba den parnok ajungshia nongita teyari agütsüdi. District ajak nung tang kanga aritepa medical facilities ajungketba mapang ka lir, koba tang ataloka aliba tensa nung tongtibangtiba maparen lir.
Metongmejen liaka jenjang tapet agiogo, ta onoki temulung lema bilemer aser Government machinerie temi temelenshi nüngdaka aliba inyakyimtem metongshia inyakyonga aotsü. Tanü asenoki inyakyim ajak atema sorkar dak tai tongloktsür. Nüburtemi kümtetba sorkari pei mapa shidak minyakra melenshitsüla saka inyakyim ajak atema maitsütsüla aser asenoki bilemba ama matalokba mapang shia nüburtemi shimba state tekolakba mapang nungi atsüngintsü asoshi makhangtsüla. Tejakleni orr aliba lokti ka yamai inyaksangshi masür. Fundamental duties tem den jangyumedema mora Fundamental rights jidangbo ajak masü.
Asenoki maneni medical aser yakbang nung inyakertem aser Government agencies tem nongita yariti, shirnoki asenok kümzüka toktsütsü asoshi inyakdar. Asenoki maneni parnok nem teyari agüja, pei kidang tekümzükba nung munga asenok shilem agidi, ta kasa sangdong ajanga metetdaktsü.