Kohima DTF-i SOP atema senden amen

Dimapur, June 8 (TYO): June 8, 2020 nü Kohima DTF on COVID-19 rongdak senden ka amendang tangalen nungi arurtem asoshi standard operating procedure (SOP) tasen yangluba benoka jembitep.
Senden nung mendenji Kohima Deputy Commissioner & Chairman DTF, Gregory Thejawelie NCS liasü aser Sr. S.P Kohima, K. Sophie; CMO Kohima, Dr.Vezokholu; Medicak Superintendent NHAK, Dr.Kuobunuo; KMC Administrator, Kovi Meyase aser tanga DTF züngsemtem aden.
Government Quarantine Centre nung aliba Medical Team-i Home Quarantine yoktsü atema temelaba agütsütsü SOP nung shia lir. Iba sülen DTF-i Chief Secretary dangi iba indang osang yoktsü aser Chief Secretary nungi temelaba anguba sülen ang Home Quarantine südaktsütsü, ta Kohima DC-i senden nung ashi.
Iba dak sendakba nung DTF-i SOP tasenba sülen anidaktsü aser NHAK nung tendangtsü atema sample bendenba mapa inyaktsü telemtetba agi.
Nisung 1348 Quarantine nung lir: June 8, 2020 tashi nung Kohima district kübok Government Institutional Quarantine Centre 5 nung tangalen nungi arur nisung 1348 tashi mongdar.
Parnok rongnung K. Badze Quarantine Centre nung 868, Meriema Quarantine Centre nung 394, JNV Quarantine Centre nung 51 aser ATI Quarantine Centre nung 7 lir.
Maneni, nisung 5 tashi Paid Quarantine facility nung lir aser IG Stadium, Kohima nung nisung 23 observation nung yua lir.