MTLT-i ki kiburtem aser MCC dang dokan para magitsü mepishir

Dimapur, June 8 (TYO): COVID-19 wara ajanga nisung ajak timtemer aser aser iba rara nung tongti süa inyakertem, district administration, NGOs aser kija ajak nem tenüngsang agütsür, ta Mokokchung Town Lanur Telongjem (MTLT)-i ashi.
Linük ajunga shibangba ajanga takoksa ajururtem rongnung shishilembartem lir aser ibaji talisa local dokan kiburtem lir. Tangar den medemdangra Mokokchung jila ya tila ka dang aser dokan kibur teimba ka lisopur lanurtem dang lir aser lockdown ajanga takoksa jenti angur, ta tanü MTLT-i sangdong ka nung ashi.
“Iba ama tensa ka nung dokan lapoka aliba ki kibur kari kanga dang taochi sayua ita ishika atema ki para magiba atema tenüngsang agütsür. Ki kiburtemi iba mapa tajung inyakba ajanga para agütsürtem senotsü khuret ajemdaktsüogo aser temulung anisüngzükdaktsüogo. Ki kiburtemi aria bilema para magiba atema MTLT-i kanga nüma atanger” ta Tir, Imkummeren Jamir aser Tongti Tezülur, Lanu Pongen nati sangdong nung shia lir.
Ki kibur kari yamaji angateta yariaka ano Mokokchung jila nung dokan tila lapoka alirtem den Mokokchung Municipal Council (MMC) Shopping Complex nung dokan lapoka alir aikati para magütsüteter. Anungji MMC-i parnok complex nung dokan lapoka alirtem dang para magitsü atema mepishir. Kasa temepishibaji tanüngba ki kiburtem danga sangoktsür, ta MTLT-isa ashi.
“Tanü asenoki ajurua aliba tensa ka nung nisung ajaki tangatetba tajung nung yariteptsüla ta MTLT-i bilemer. Mokokchung jila nung alir ajaki kin mesüra tamangba yimsü telemsa kecha melii ajak ajungtsü atema yaritepba atema pelar. Iba ama mapang ka nung Mokokchung Municipal Council aser ali kiburtemi taochi sayura nübortemi tenüngsang agütsütsü aser asen Tsüngremia kanga pelatsü” ta MTLT-isa metetdaktsü.