Jal Jeevan Mission atema Kohima nung senden amen

Dimapur, Aami/June 16 (TYO): Flagship program, Jal Jeevan Mission mapa küma inyaka aotsü atema Deputy Commissioner Kohima Gregory Thejawelie aser District Water Sanitation Mission züngsemtem DC Office chamber, Kohima nung June 15, 2020 nü senden ka mena liasü.
Iba senden nung PHE Department nungi ketdangsertemi ashiba agi, Jal Jeevan Mission ya central sorkari tenzük aser India nung aliba kilen ajak nem pipe ajanga tzü agütsütsü nükjidong nung Ministry of Jal Shakti kübok lir, ta ashi.
District Water Sanitation Mission nung Deputy Commissioner tekolakba asütsü aser district level nung Head of the department tem kar züngsem süa iba Jal Jeevan Mission ya inyaktsü.
2024 küm tashinung India kübok yimtsüngtem nung aliba kilen ajak nung tajemtsü tzü peria pipeline ajanga agütsütsü iba mission nükjidong lir.
Jal Jeevan Mission ya yimtsüng ka nung tzü anguba dak ajemdaker inyaktsü aser yangji osang tsüsang, shisatsü aser tesendaktep dena lir, kong nübur ajaki shilem agitsü.
Iba senden nungsa Kohima district kübok yimtsüngtem nung iba maparen inyaktsü asoshi yimtsüngtem shimteta liasü.