Bhandari Block Task Force senden amen

Dimapur, Aami/June 16 (TYO): June 15 nü Additional Deputy Commissioner, Bhandari conference hall nung COVID-19 dak sendakba Block Task Force (BTF) Bhandari senden ka menogo. Iba senden nung Bhandari sub division nung COVID-19 dak sendakba maparen balala lepa reprangshia sensakasem.
Sub division kübok administrative headquarter aser yimtsüng jenjang ajak asadanga, Additional Deputy Commissioner and Chairman, BTF, Tiameren Chang, NCS-i ashiba agi, COVID-19 management SOP aser protocol ajak takok nung odar.
Senden nung BTF züngsemtemi SOP tetuyuba dak ajemdaker quarantine nung yua aliba nisung 16, kidang quarantine asütsü atema 16.06.2020 nü yoktsü, ta metetdaktsü.
Tang tensa mejungi aliba mapang tongtibang tesemtem meita alitsü atema police nübu agi ajema aliba indang senden nung sensakasem, aser police talila meshitsü atema iba ken o dak sendaka aliba ketdangsertem den tongteprateptsü asoshi telemtetba agi.
Senden nung ketdangser kati, Inter-State arrtsü nung arrtsü tamaitsü ka maliba ajanga 12 IRP personnel tem arrtsü anüktsü asoshi timtem ajuruba indang metetdaktsü, aser arrtsü takok ngua shibanga yutettsü asoshi jenjang tapet ka agitsü asoshi benoka liasü.
Senden nungsa sub division kübok quarantine nung amungertem ajangzüktsü asoshi sensak asem aser parnok institutional quarantine centres tem nung amungba mapang anisüngzüka mungdaktsütsü asoshi inyakyimtem maneni asadangshia alitsü asoshi telemtetba agi.
Lokti tentet balalai yakbang nung inyakertem ama BTF nung shilem agia district administration, medical aser police nem teyari agütsüba atema tenüngsang agüja, ADC aser mendenbuba Tiameren Chang-i, iba amala timtem mapang khuret lemsatepba inyakba ajanga nüburtem ajangzüker, ta ashi.
Paisa Arogo tenzükertem aser Community Health Centre (CHC) Bhandari nung health worker temi quarantine centre tem nung munga alirtem nem tensa koktettsü asoshi counseling balala agütsüba, aser sub division nung quarantine centres tem yimjung nung anep anepa inyaksangshitettsü asoshi teyari agütsüba atema parnok dang pelaba lemsatep.