Health Department nung mepetmesü adokba atema tebilemtsü abener: NPCC

Dimapur, June 16 (TYO): Nagaland health department nung mepetmesü adokba atema tebilemtsü abener aser iba ya matalokdaktsütsüba asü ta Nagaland Pradesh Congress Committee (NPCC)-i tanü metetdaktsüogo.
NPCC-isa state sorkar dang June 13 nü general duty medical officer 25 indang mapa regularize asütsü lemtetba meyipa agitsü metetdaktsüogo.
Medical officer 27 ji COVID-19 wara azüokba maparen nung yariteptsü atema May 27, 2020 nü shimba lir. Parnok ya contract tangatetba nung ita 12 atema mapa nung shimok.
NPCC president K. Therie-i National Health Mission Employees Association Nagaland (NEAN) dang nisung takümtem kümzüktsü atema lungkak aitba anentsü atema ayongzük.
“State sorkari NEAN aser Nagaland Junior Doctors Association (NJDA) tsüngda tangatettep kati maruba atema mepelar. State Cabinet-i iba tensa ka nung medical department asoshi telemtetba agiba ya kanga meshidak. Tang ya regularize asütsüba nung temulung agütsüba mapang ka masü” ta K. Therie-i ashi.
“Asen nübortem novel coronavirus wara nungi kümzüka ayutsü atema tang ya medical wadang nung inyakertem nübo kanga nüngdaker. Iba mapang ya asenok ajak longjemer inyaktsüla” ta paisa ashi.
“NHM employees nem tagütsütsü tim magütsüba ya Congress party-i tetenzük nungi meteta lir. Parnok nem mapa kasa süaka itasen tajemba agütsür, outposts nung teimba mapa lemzüktsür aser mapang shitak nung itasen magütsür” ta NPCC president-isa metetdaktsü.
Sorkari mapa inyaker ajak kasa züngshitsüla aser nisung kar mesüra telok kar peladaktsütsü atema dang meinyaktsüla, ta paisa ashi.
Nagaland state cabinet-i telemtetba agibaji Constitution nung kasa maongka agütsütsü temeten agütsüba anema lir. Anungji jungjunga meshisadangi telemtetbatem magitsüla, ta K. Therie-isa ashi.
Sorkar mapa nung regularize asütsü atema küm asem mapa inyaktsü lateta lir aser kasa qualifications aser kasa mapa atema itasen kasa agütsütsüla, ta paisa shisem.
Itasen nung metokmeperi alibatemji state sorkari Centre sorkar den angatetteptsüla. State sorkari tangatetba tajung nung aser inyakyim lateta aliba nung ajemdaker NEAN aser NJDA den jungjunga olemteptsüla, ta K Therie-isa metetdaktsü.