Kiphire DTF-i GBs aser Ward Chairman den senden amen

Kiphire, Aami/June 17, 2020 (TYO): Mongolbarnü, DPDB Hall nung Kiphire DTF züngsemtemi GBs aser ward chairmen den telongjem senden ka ayonga agiogo, kong Deputy Commissioner Sarita Yadav IAS mendenti liasü.
Addl. SP Erie Kajire-i ashiba agi, district nung tanü tashi COVID-19 wara nokdangtsü asoshi sorkar ajanga wara azüoktsü tekümdangtsü meratem agütsü, kong Kiphire nüburtemi pelashishia agizükogo aser parnok nungi telangzüba tajung nguogo.
Anungji, tang ama sorkar inyakyim aser tetuyuba nung amalitepa inyaka aotsü asoshi tantsü tambu dang pai mepishia liasü.
Senden nung Deputy CMO Tinurenla-i, tanga state nungi arurtem, shirnok Kiphire jila kübok quarantine centre nung amunger, shirnok anaben tashi tendangba sülen tashidak meputet, parnok pei pei kidangi yokadokogo, ta metetdaktsü.
Anungji, atsüayaonga meli quarantine centre nungi yokadoker tem pelashishia agizüktsü asoshi lai tsüraburtem dang mepishi.
Tang ama tensa ka nung, sorkar inyakyim nung nungitba asoshi DC Sarita Yadav-i GBs, Ward nung tantsü tambu aser lokti tentet balala dang pelaba metetdakja liasü.
Kiphire nung nüburtemi kin tebendang kecha melii tarurtem ajak pelashishia agizüka aser temeim mapa sayuogo, ta lai shisem.
Kiphire quarantine centre nung tetendangba agir sülen tashidak meputeter tem pei pei talidaki yokadoktsü dak sendkba nung GBs aser Ward Chairman temi anepalua maparen achaayangtsü atema senden nung teloki lemteta liasü.
Quarantine centre nungi tashidak malirtem yokadoktsü mechi, DTF den külemi inyaktsü asoshi GBs aser Ward chairmen atema Asuthong Tikhirwas ya Nodal Officer ama teloki shimogo, ta sangdong ajanga metetdaktsü.