Longleng nung TrueNat machine amenokogo

Dimapur, Aami/June 17 (TYO): District COVID-19 Hospital, Longleng nung TrueNat machine ka June 17, 2020 nü amenoka Deputy Commissioner, M. Shayung Phom, Superintendent of Police, Yanithung Ezung aser Phom Peoples’ Council (PPC) tir nungeri anir sorkar ketdangser, NGO aser civil society tem matsüngdang Executive Secretary, Phom Baptist Christian Association (PBCA), Tialemba Phom ajanga meshiteta sarasadem.
Nüburtemi akhangba angashia TrueNat Machine agütsüba atema Deputy Commissioner M. Shayung Phom-i Nagaland Chief Minister Neiphiu Rio, Health Minister S. Pangnyu Pho maser ketdangsertem dang pelaba lemsatep.
TrueNat machine amenokba ajanga senzüsempongba nung senotsü indokba, mapang achiba aser nübu indokba ajema akümtsü aser mapang shidak nung result metettsü, ta pai ashi. DC-i medical fraternity dang nüburtem tenzükba nung iba machine kanga anepalua amshitsü ayongzük.
Frontline worker, talisa medical fraternity, DTF, administration, Police, sorkar ketdangser, PPC, PBCA, Phomla Hoichem, PSC, arogo aser kijai anibelem mesasai inyakba den senotsü aser osettsüset balala tenlaba atema DC, Shayung Phom-i pelaba lemsatep.
Sorkar ketdangser, NGO, arogo aser civil society temi lungjemer inyakba ya district nung ashishitep kecha melie yimjung nung aliba nung meteter aser tang tashi COVID-19 tashidak prokshiba azüoktsü asoshi maparen balala inyakba mapang maginütsüsa tatalokba kecha mali, ta pai ashi.
COVID-19 den raraba nung kisüng masü saka district nung terenlok maparen atema ajak lungjemer maneni nokdaktsü asoshi DC-isa ayongzük.
Iba machine agütsüba asoshi Dr. Lhouzovituo Belho, MS, District Hospital Longleng ajanga sorkar dang pelaba lemsatep aser medical department den DTF, Administration, Police, VGs, Churches, NGOs aser civil society temi yaritepba asoshia pelaba shisem.
Pai ashiba agi, TrueNat double channel machine den test kits cartridge 200 sorkari agütsü aser iba machine amenokba sentong tembangba sülen Quarantine Center tem nung alir tendang tenzüktsü.
TrueNat machine amenokba ajanga department khuret pongbadaktsür aser iba virus den raratsü atema temolung lema lir, ta Dr. Belho-i ashi. Paisa iba machine ajanga coronavirus dang masü saka tashidak balala atema tajangzük aliba indanga lemsatep.
Phom Peoples’ Council (PPC) tir-ia iba sentong nung jembiba mapang TrueNat machine agütsüba atema sorkar aser department dang pelaba lemsatep aser PPC-ia TrueNat machine ka alitsü sentong lir, koba mozüki nem yakta agütsütsü, ta shisem.
COVID-19 den raraba mapang frontline worker den amalitem akatsü aser yariteptsü, ta paisa ashi.
Iba sentong nung Dr. Ademla, Sr. Medical Officer, Longleng menden liasü.