Noklak SDPDP senden nung HSLC result majungba indang jembi

Dimapur, Aami/June 17 (TYO): Noklak nung ita shia amenba Noklak Sub-Divisional Planning & Development Board (SDPDB) senden, June ita atema June 17, 2020 nü Khiamniungan Tribal Council hall nung Additional Deputy Commissioner aser Vice-Chairman SDPDB Noklak, M.Chaitanya Prasad, IAS lenisüba kübok mena liasü.
Iba senden nung Principal, GHSS Noklak,Y.Khongkhao Lushing ajanga osang agütsüba nung ajemdaker NBSE ajanga agiba HSLC aser HSSLC Examination 2020 result indang jembi. House nung HSLC result majungba indang jembi, ajisüaka HSSLC jenjang nungbo kanga junga takok ngua liasü, aser iba atem school ketdangser nem tenüngsang agütsü.
HSLC nung result maneni junga mongutetba atema temelenshitsütem ajitetba metongshitepa liasü aser senden nung adenertemi school ketdangsertem dang attendance kanga junga agia Parent-Teachers Meeting amala agitsü ashi.
Vice-Chariman ajanga state aser district nung COVID-19 tensa indang rasaa ashi aser iba sülen Senior Medical Officer, CHC Noklak ajanga sub-division nung TrueNat machine nüngdakba indang süoka jembi, kechiaser sub-division ya danga linük den arrtsüa lir, aser meta talang nung aliba ajanga timtem jenti ajurur. Iba dak sendakba ken o ya taruba COVID-19 Noklak Task Force senden nung jembitsü lemtet.
COVID-19 tashidak tsüpuba ajanga colony kar nung atsü atsüa lir, ta Coy Commander, 3rd NAP Noklak ajanga ashi aser nüburtemi menüngdakba mapa inyakba ajemdaktsütsü asoshi iba tashidak indang olulu prokshiba aser meshidaki angateta aliba rajemdaktsütsü senden nung lemtet. Iba dak sendakba nung tekeratiba nung Community awareness sentongtem agitsü asoshi Medical Department nem nungloktsü.
2020-21 atema LADP proposal tem koba 56 aser 57 Assembly Constituency nungi Advisor temi benoka ali, ibaji agizüka ayutsü atema senden nung jembi. Government Guidelines nung aliba ama item proposal ya senden nung jembir agizüka ayu.
Tzüngluruwa tenzüker asünung June 20, 2020 nü mass social work alitsü senden nung lemtet.