Tuensang onük atema JIC-i bushitetba osang agütsüogo

Dimapur, June 17 (Agencies): May 26, 2020 nü COVID-19 keta alir ka Tuensang-i yokba bushisüngdangtsü atema tentetba Judiciary Inquiry Committee (JIC)-i yashi nikongtsütsü parnoki bushitetba osang agütsüogo.
Züngsem asemi akümba JIC nem anogo 15 tsüngda iba tatalokba bushisüngdanger osang agütsütsü mapang latetja liasü.
Tanü Kohima nung Chief Minister’er kidang iba dak sendakba nung Eastern Nagaland People’s Organization (ENPO) lennirtem den senden ka amen.
Senden nungji Chief Minister, Neiphiu Rio, Deputy Chief Minister, Y. Patton aser tanga MLA tem aser Tir Kekongchim-i anir ENPO lennirtem aden.
“Onoki yasüng ang osangji anguba agi tanü tatembang telemtetba kecha magitet” ta Deputy CM, Y. Patton-i osangbener dang ashi.
JIC-i agütsüba osangji Chief Minister aser tanga ketdangsertemi jungjunga reprangdangtsü aser iba sülen Cabinet senden ka jatepa amentsü, ta Y Patton-isa ashi.
ENPO ketdangpurtemia Cabinet telemtetba atatsü mulungogo, ta paisa shisem.
Iba tatalokba atema ENPO-i Chief Minister dang anogo asemnü tsüngda aibelena inyakba ketdangsertem merenshiang ta mapang latetja liasü.
Ajisüaka, June 6, 2020 nü ENPO-i Chief Minister aser Cabinet Minister tem den senden ka amenba sülen JIC indang osang atatsü mulunga agizük.