SSB nung ‘interview system’ malitsüla: ACAUT

Dimapur, June 17 (TYO): Mapang talangka rarayonga aruba sülen NSF aser Chief Minister Rio nungertemi Staff Selection Board (SSB) atema telemtetba agiogo, ta ACAUT-i tanü metetdaktsü.
2015 küm iba onük ya mezüng ACAUT-i T.R. Zeliang’er sorkar den jembitsü tenzük. ACAUT-i anir backdoor appointment mapang iba Nagaland nung non-gazetted posts shimtsü atema SSB ka nüngdaker ta angatet, ta ACAUT-i ashi.
June 26, 2015 nü ACAUT-i taoba Chief Secretary, Pankaj Kumar, IAS dang SSB tentettsü atema memorandum ka agütsü. Iba sülen nungi mapa inyaka arudang PSAN-ia 2016 küm iba onük ya sorkar den benoka jembitsü tenzük. Iba jagi ACAUT aser PSAN külemi PCC kübok Secretariat, Kohima jakdang Lokayukta aser SSB tentettsü atema lumia lungkak ait, ta ACAUT-isa metetdaktsü.
T.R. Zeliang-i aniba Cabinet-i November 17, 2017 nü ACAUT aser PSAN den senden amendang Lokayukta tentettsü aser NPSC interview marks 75 nungi 55 ajemtsü mulunga agizük. Ajisüaka, 2018 küm tetenzüklen state assembly elections agiba ajanga SSB tentettsü atema mapa inyakba nung tetsükdaktsü ajuru, ta parnokisa ashi.
Naga nunger atema kanga tia kaa, Tir Ninoto Awomi-i anir NSF telok tasenji SSB atema inyaktsü tenzük aser küm 5 sülen iba ya asangsang nung atalokogo.
SSB nung interview system malitsüla aser candidate shimtsü atema written examination dang alitsüla ta onoki NSF aser Chief Minister Rio dang ashir. SSB nung interview marks denra, NPSC ama dang asütsü. SSB nung interview system malitsüla ta asüba ya PM Modi’er sorkari January 1, 2016 nungi centre sorkar kübok Group D, C aser Group B non-gazetted posts atema inyakba den kasa lir, ta ACAUT-isa metetdaktsü.
Nagaland nung Lokayukta aser SSB tentetba atema taoba Chief Minister T.R. Zeliang aser tang teinyakdak Chief Minister Neiphiu Rio nati tenüng agir, ta parnokisa shisem.