LRD-i aluyimer nem tsünüsenbongtsü balala lema agütsü

Longleng, Aami/June 28, 2020 (TYO): Taoba ita ishika tejakdang nungi PMKSY-WDC Project kübok Department of Land Resource (LRD), Longleng-i district kübok aluyimertem nem metsüjang/tsünüsenbongtsü balala lema agütsüba den maparen balala tenzükja arudar.
District Project Officer (DPO), Kughalu Chishi-i anir LRD team-i project yimtsüngtem semdanga aser aluyimer nem tsünüsenbongtsü tapu balala lema agütsüogo.
District kübok yimtsüng balala nung aluyimertem rongsenkettsüng tsütsü terenlok lidaktsütsü nükjidong nung 2020 küm atema tzü mopung den apet asadanger, Longleng nung, coffee aser rubber dak alaka item project yimtsüngtem nung Department of Land Resources-i kozü, moji, jiru, elaichi, naring, litchi, patiou (beetle vine) aser gol mirchi lema agütsü.
Alima ajunga asüngba coronavirus wara tenokdangba ajanga, tang yimtsüng nung alirtemi süngjanglijang aser süngolemba timba tsünütsü asoshi angateta aruogo aser yimtsüng nung tangar dak memetaloki pei sasa inyaka aser aazüka ka-ita peria aliba den yimtsüng sasep nung rongsenkettsüng ajungkettsütsü aser kibong nunga tachi tajemtsü peria lidaktsütsü nükjidong yur alu nung mozü mamshi tsünüsenbongtsü adokdaktsütsü indang tongtibang teinyaktsütem parnoki agizüka liasü.
Kasa mapang, Longleng District kübok iba Department-i district indang project yimtsüng shia nung permaculture den sendaktepa kitchen garden tenzüktsüogo.
Iba den külemi, Department-i aluyimer nem leptsü dong (broom grass) den naganeem, lali, kadam, hollock aser khokon süngdongtem (sapling) agütsü. Aluyimer temi pei tesem nung tzü mopung den apet yoktsü/tsünütsü asoshi, tanga süngdong (sapling) talisa Dankhao yimtsüng nung naring aser litchi, Yongnyah yimtsüng nung elaichi, Niang aser Yongshai yimtsüng nung leptsü, Orangkong yimtsüng nung litchi, Yaong (B) nung jiru, Niang aser Shamshangching yimtsüng nung patiou dong (betel vine), Yongnyah nung khokoon/hollock, Yongnyah, Yongam aser Buramsang yimtsüng nung gol mirchi, Setap, Apoiji, Kangching aser Tamlu yimtsüngtem nung kozüdong lema agütsüogo.
Maneni, Department-isa Longleng District kübok project yimtsüng 25 nung giloy süngdong aser drumstick (cutting) tem lema agüja liasü. Giloy aser drumstick yagi mozü yanglur aser temang nunga teyari agütsür asünung, tang ama mejangjaba COVID-19 wara lendongbang aser menatepba wara/tashidak tanga nungi yimtsüng nung alirtem kümzüka jenboa alitsüsa, pei pei atsü nung atemtsü asoshi kilen shia nung Department of Land Resource-i giloy aser drumstick lema agütsüogo, ta sangdong ka ajanga metetdaktsü.