Kohima nung nisung tepsetba atema WC, NNPGs temi aitsür

Dimapur, Aami/June 28 (TYO): Anti Extortionist Squad ta nüngja agüja alirtemi Kohima nung June 23, 2020 nü tashiyim agi senotsü sarur ta tai tonglokja alir tepsetba ya kangadang tim masü. Asür ya Naga political group kar nungia süang tesü, prangbong bena malir ka khasetba ya tasümait mapa. Training agir asünung, police temi yimya balala amshia, kanga kümdanga temolung melemteti alir aputsüla, ta NNPGs Working Committee sangdong ka ajanga ashi.
Iba ajanga high school certificate taila bener backdoor ajanga shimmer timba aliba ya yimtong nung mapa inyaktsü metemsü, ta tejangja sayur. Nüburtem merenshia aoksadaktsüba yagi tajangzük kecha bener marutsü. Parnoki nüburtem taküm lendongi yokba ama dangar shingaia meyoktsü. Kohima jila nung nisung tepsetba maparen ya nisung tenük angi nguogo. Nisung ka dak tekolak nung akha aser tatsüka lir rarapangsenba mapang tia maka injang khaloktsü ta ashiba nung jenjang maket. Iba ama nisung tepsetba inyakyim ya police department atema maksü aser tenüng menükba maparen ka lir, koba shingaia magizüktettsü. Tashiyim agi senotsü sarur ta tai tonglokja alir tepsetba ajanga police temi parnok ya shidakba tashiyim amshia senotsü sarur ta kuli sayuteter asü? Masü! ta NNPGs Working Committee sangdong ajanga ashi.
Anti Extortionist Squad ta nüngja agütsür aliba telok ka yimtong nung aliba azü ama injang agi akhatsü totuyuba bener nemzüba ya kanga tia maka lir.
Tesüiba mapang ya tatishitsü kanga tajung. Nagaland ya kanga tila, anungji shibai khaset, ajia metettsü. Tarutsü nung WC ola madoki repranga matatsü. Ketdangser nungi tenzüka alo nung alirtem tashi dang police temi tashiyim amshia anogoshi senotsü meshiba receipt aser tenük kuli dena document tem lir, shirnoki item amala uniform agir tashiyim amshia sarusajir anema nokdaktsü? GoI nungi ita shia itasen den teyari balala agir saka ajiakia meperir, anungji uniform agir businesses dang senotsü sarutsü atema tilartem yoker? Dokan aser commercial centres aser talisa Nagaland-i aru tajangzük tulu yangluteter nungi teyari terara agütsüba bushir National Worker tem nokdangtsü asoshi police force dak kechi tashi ali? Naga nunger masüba shishilempar ajungai Naga nunger puti otsü, timtemba aser Naga nunger jenjang kanga junga meteta lir. Naga movement taküm alitsü ya tongtipang ta parnoki meteta lir aser yimtenren nung mangatetep aliba mebentet tashi anti extortion squad dena-medenia manendaktsütsüla, ta kasa sangdong ajanga ashi.
Office, dokan, shishilempaba tesem, transit gates, transporter, danga businesses nungi lenmang nung ‘mineral water’ ayoker dang tashi, revenue adokba wadang ajak nung police temi ozüng alema senotsü saruba meyongnem wangshi wangshia lir. Naga national workers temia office nung dang mener phone ajanga dang jembirtem dena police extortionist dak tenük yoktsü atema kasa anti extortion squad tentettsü asü? Tasüngdangbaji ya dang, ozüng alema tashiyim amshia senotsü sarur chichibaji shirnok? ta Working Committee, NNPGs sangdong ajanga asüngdang.
Naga National worker temi yimtenren inyakyim ka aser khuret abentsü senmang amanga lir, koba India nunger nüjiso mangudang nungi liasü ta police temi angatettsüla.
Onok timtem tenzükba mapang nungi tajung ka atema terara teyari ajaki agüja arur. Anungji ozüng alema tashiyim agi senotsü saruba onük madoker. Onok yimtenren nung timtema nokdakba ya Naga nungeri Naga nunger puti otsü aser yimtenren temeden wazüka ayutsü atema nokdaker. WC ajanga maneni Naga nunger li nung aliba Naga nunger temolunger aser Non-Naga business establishment tem nungi teyari meshitsü. Ibai tangatetep nung maneni inyaktsü. Tang mapang ya rongsenketsüng tsütsü nübur ajak asoshi timtemba mapang ka lir, koba asen tenük agi angur. Ajisüaka nisung kar lir, shirnoki tensa tajung aser tamajung nunga metenlar, mesüra Naga nunger yimtenren aser puti otsü temedena mangateter. Tsükchirtem den miimshia lungjemer parnoki Naga nunger tejangraba samatsütsü meranger. Otsü nung parnok tenüngtem aitsü, ta sangdong ajang ashi.
GOI aser WC na tsüngda tang yimtenren ken o jembishinüba jenjang den medemdanga Naga National political groups (WC, NNPGs) ajanga naga nunger dang tashiyim amshia senotsü meshir/sauru aser linük tenzüker tejangja tsüngda bendangtsü ajungshir. Naga political movement mesamai alitsü atema WC, NNPG ajanga akokba mera agia inyakdagi. Onok khuret ya tekeratiba nung Naga nunger ajunga atema ajaki akhumtsübua aser agizüktettsüsa yimtenren tangatetep ka ngutettsüba ya lir, ta Working Committee, NNPGs ajanga ashi.