COVID-19 Nagaland: Nisung 415 nungi 164-i taneptsü nguogo

Kohima, June 28 (TYO): Nagaland nung Deobarnü nisung 28 dak COVID-19 putetogo aser parnok züngsema nisung ajak agi 415 kümogo.
Nagaland nung nisung 164-i taneptsü nguogo aser nisung 251 mozü ki balala nung anepaludar.
“Sample 624 tendangba nungi nisung 28 dak COVID-19 aliba putetogo” ta Health & Family Welfare Minister, S Pangnyu Phom-i metetdaktsü.
Tanü putetertemji Dimapur nungi 20, Kohima aser Mon nungi asemsem, aser Peren nungi 2 lir, ta paisa ashi.
Tang Nagaland nung COVID-19 aliba district temji, Dimapur – 183, Peren – 88, Kohima – 94, Mon – 38, Tuensang – 8, Zunheboto – 3 aser Phek – 1, ta Health Department-i metetdaktsü.
District pezü- Mokokchung, Longleng, Kiphire aser Wokha nungibo tanü tashi nisung ka dak danga COVID-19 puteta mali, ta Health Department-isa metetdaktsüogo.
Tanü tashi nung sample 11,449 tendangtsü agütsüogo. Iba nung jagi sample 7,794 tashi BSL-3 lab, NHAK nung tendangtsü agütsüba nungi sample 7,315 tendangdang 341 dak positive putet, ta Principal Secretary Home-i tanü metetdaktsü.
Iba dakji alia sample 4,548 tashi Truenat machine ajanga tendangba nungi sample 108 positive putet aser itemji RT-PCR ajanga jangjashitsü yokogo, ta paisa ashi.
Tanü tashi nung nisung 5,632 tashi Facility Quarantine nung mongdar, ta Principal Secretary Home-isa metetdaktsüogo.
Nisung kar aketba, temang metaa shirangba mesüra tango sashiba nung timtem adokra, State Helpline Number 1800 345 0019 nung tongteptsü akok. Nisung ajaki public tesemtem nung mask enoktsüla aser nisung o nisung tsüngda tepila ayutsüla, ta paisa shisem.