Manipur nung July 15, 2020 tashi lockdown atsülanger

Imphal, June 28 (Agencies): Manipur sorkari anogo 15 nü atema lockdown atsülangtsü telemtetba agiogo, ta Chief Minister, N. Biren Singh-i tanü metetdaktsüogo.
Deobarnü Chief Minister’s Secretariat nung Biren Singh-i osangbener den jembidang July 1 nungi 15 tashi lockdown atsülangtsü lemtetba osangji ashi.
July 1 nungi inter-district bus service senzütsü sorkari telemtegba agiogo. Tanga public transport system kecha mesenzüdaktsütsü, ta Chief Minister-isa ashi.
Manipur nung nisung 1094 dak COVID-19 putetogo aser parnok rongnung nisung 432-i taneptsü nguogo aser 660 anepaludar. Anogoshia sample 2600 jungnüa tendanger aser tang tashi nung sample 50,000 tema tendangogo, ta Biren Singh-isa shisem.
State Corpus Fund aser Chief Minister’s COVID-19 Relief Fund nung Rs. 14.41 crores tenla aruba nungi COVID-19 anema mapa inyakba nung amshir. Tangalen nungi arurtem, jangotsü aliba, tangalen anendaka alir nem teyari agütsü aser Committee of CSOs-i osang prokshiba maparen nung Rs. 18.22 crores endokogo, ta Manipur chief minister-isa ashi.