Kidang nungi angazükba putu

School nung admission agitsü asoshi shinga school ki tashi tsüngdong tarudaktsü saka admission mapatem ajak online nung dang agiang ta sangdongba osang ya tanü putu dak apet tsüngkang medema aotsü merangba osang ka lir. Iba denji ano akhi ama takdang ka nung lokti külemi sendena class agitsü memelar, anungji tanurtem ajak pei kidang nungi dang online class nung denang ta metetdaktsüba osangjia putu tasen nung angazükyim melenshiba mapa ka asütsü. Kimai tatsükata ayazüka mao ser kidang nungi dang admission agitsü aser class-a agitsü ta asüdangjibo melamelar aser zübazübar asütsü amato bilemtsü saka sensaker ajungdakbo kecha maka ta jembiba ama, sensaker asoshibo tsüngdong moi kidang nungi mopong ajanga dang admission agir class nung adentsübaji tamakoktsü mapa amai akümer.Atangji,tang alima tesem ajaklen tashidak wara agi amokmerenba mapang asünungji lokti sentepdak aser kaketreju ajak shibanga lir aser iba amai mapang kopiga aotsüar shingaia meshitettsü. Joko, tang tashi nunga ita asem dak tali kaketrejutem mepelapokba agi tanurtem kanga akoksadi. Ano, talisa private school-tembo aika school lapoka mesayu nungji tanurtem dang nungi fee agili asüa majung aser magili asüa majung ta oda oda tesayurtem nema ita sen magütsütet kümadoktsü ana nung lir.Iba ama timtem mapang koktettsü asoshi government-ia aser school-ia tanurtem pie kidang nungi angazüktsüsa online nung sayuba sentong tenzükba angur. Ibaji junger saka timtem kaji, Nagaland nung government aser private school nung azüngertem rongnung laptop mesüra personal computer alia amshitsübajibo yutsür teküpbokba jenjang agia tanur shia smart mobile phone akua malitettsüba kibongtemji noklang nung shilem tesadangka (50%) dak tali lir. Naga nunger kibong aika nung anarongdena tsürabur ka ket nung mobile phone ka alitsü,anungji iba phone-ji par chir shiba nem agütsür, shiba nem magütsütsü ta asüba jepaka nüktsü malu timtem ajurudagi. Iba denji ano phone aliyonga Nagaland tesem aika nung network majungba agi tanurtem aika online class nung junga metentetter. Atangji, School Education department-i mobile aser computer ajanga dang masü saka radio ajanga tesayurtem nem sayudaktsür, ajisüaka anoo Nagaland tesem aika nung radioa junga mapur. Iba denji ano tebilemtsü kaji,tanü asüng tv aser mobile putu asünungji aikati radio mamshir aser ano radiojia aikati malitettsü. Iba ama timtem aliba agi, talisa India lima tesem aika nung online class agiba ya sensakertem anema, anungji magitsüla ta anema apusor. Ajisüaka, jenjang asakba agi online class magi anenbaji tanü putu dak mapetba mapa ka asütsü. Tanü putu yabo kechisarina ajak mopong ajanga dang inyakba putu, anungji pi mopong nung senzüdang asenok ali nung tetsüng agi senzüra, tangar memeneptsü aser asenokang akoksatsü. Item timtem aser nüngdak ajakji asadanga government-i Nagaland Board of School Education kübok azünger tanur shia nem scholarship sen agütsüba amai smart mobile phone mesüra radio kakabosa agütsütettsüla. Iba denji Doordarshan television ajangaa class agiba sentong alitsüla aser Nagaland tesem jaklen internet aser radio wave aputsüsa inyaktettsüla. Iba ama temelenshi yagi,Naga nunger tanurtema alima aso 21 buba nung sotetba purtem ama tangar den kasasa toktepa tajung kümtettsü.