Dimapur nung Naga cemetery tasenba lapokogo

Dimapur, July 1 (TYO): Bodbarnü Agriculture & Cooperation Minister, G Kaito Aye-i Dimapur nung Naga cemetery tasenba lapoktsüogo.
Iba leper tasen ya Dimapur jila nungi kilometre 4 shi pilar Zani yimtsüng nung lir.
Tanü Minister Kaito-i Dimapur Naga Council dang tashi itshitsü aser nübortem atema ola ka asütsü ayongzük.
Naga Council-i Naga cemetery tasenba yangluba atema paisa pelaba shisem.
Lake View colony nung aliba Naga cemetery tejenba nung mang aremdak maliba ajanga Dimapur nung alirtem kanga timtem aruogo.
Naga cemetery tasenba indang ali ya 2005 küm chief minister Neiphiu Rio-i tenla agütsüba liasü. Iba leper ya bigha 18 lir, ajisüaka senotsü timtem kar aliba ajanga mapang shitak nung leper melapokteti liasü.
Naga Council-i ashiba agi leper tasenba nung kobi melii mang remdaktsütsü aser Covid-19 ajanga asürtem aremtsü atema block balala lemzükja lir.
Iba leper nung mang aremtsü tasazük ka latetja lir aser yin agi kecha meyangludaktsütsü. Iba leper nung mang ka aremtsü atema 3 ft x 7 ft tasazük agütsütsü aser ali telunglen feet 6 atutsü. Iba sülen temalen feet 1 tashi dang leper yangludaktsütsü, ta Naga Council-isa metetdaktsüogo.
Iba leper yangluba mapa asoshi tenla agütsür ajak dang pelar, ta parnokisa shisem.
Tanü leper tasen lapokba sentong nung Power Advisor, Tovihoto Ayemi aser Dimapur Deputy Commissioner, Anoop Khinchi natia o jembi.
Iba leper ya Konyak Baptist Church Dimapur Pastor, Rev. Lonlong Konyak-i meshiteta sarasademtsü.