Dimapur QC nung Peren, Mon aser Longleng pur anenzüktsü

Dimapur, July 1 (TYO): July 1, 2020 nü Nagaland Agriculture Production Commissioner & Dimapur district COVID 19 in-charge, Kikheto Sema-i Nagaland nung district ajak indang Nodal officer tem senden ka ayonga menogo.
Iba senden ya Saramati hotel, Dimapur nung agi aser Team Dimapur nungi Accomodation, Transport aser Food Committee Convenor tema aden.
COVID 19 wara anema külemi longjemer raratsü atema iba senden ya amentsü jatepba liasü.
“Tang nungi Peren aser Mon district tem nung alir tangalen nungi arur ajak Dimapur nung quarantine asütsü. Iba ya Peren aser Mon district temi mepishiba aser High Powered Committee-i tuyuba lir. Maneni, Longleng district-ia Dimapur nung quarantine südaktsütsü mepishiba Team Dimapur-i mulunga agizükogo” ta Kikheto Sema-i ashi.
Senden nung Nodal officer temi khuret ajuruba lemsatepdang, Dimapur nung kiyong karibo quarantine tembanga amongertem marudaktsür ta ashi.
Iba atema, Quarantine Center (QC)-i kulikaket ka agütsütsü aser iba sülen Quarantine nung amonger tsürabur/kinunger khuret asütsü ta telemtetba agi.
Sorkari linük kübok tesem balala nungi tanurtem anir aruba, chiyungtsü agütsüba, test agiba, quarantine nung mongdaktsüba atema nübortemi pelatsüla. Anungji parnok QC nung tamongtsü tashi monger yokba sülenbo, parnok pei talidak mesüra yimtsüngi aotsü atema sorkar mesüra doctor tem nem timtem magütsütsüla, ta senden nung adenertemi metetdaktsü.
Tangalen nungi arur tsüraburtemi tanü tashi COVID-19 wara anema tongti süa rarartem dang pelaba osang kecha mali, ta Kikheto Sema-i ashi.
“Corona anema rara ya asenok longjemra takok angutsü anungji nenoki (Nodal officer) khuret kar ajurura lemsatepangma, kechiyong Team Dimapur-i ibaji koktettsü” ta paisa shisem.
Nagaland nung tzünglu kanga arutsü aser iba ajanga anentsüh aser lendongtem ataloktsü akok. Iba atema Team Dimapur renema lir, ta Kikheto-isa ashi.
Senden nung Member Empowered Committee, Honje Konyak-ia nodal officer ajak dang külemi yariteptsü aser khuret ajak Team Dimapur den lemsateptsü atema ayongzük.
“COVID 19 anema rara nung akokba tashi inyaktsü, ajisüaka nübo peria mali aser health worker tem kanga anibelemogo aser iba jagi anisüngzük nüngdaker” ta CMO Dimapur, Dr. Tiasunep-ia ashi.
Iba atema Kikheto-i CMO dang Mon, Peren aser Longleng nungi arurtem anepalutsü atema nübo nüngdakra Medical Department dang doctor aser medical staff talila lemzüktsütsü atema shidi zülutsü ta ashi.
Tanga district nungi arurtem Agri Expo nung aliba transit camp nung anenzükdaktsütsü aser kar tanga Quarantine Center (QC)-i yoktsü, ta Accomodation Committee Convenor, Mhalo-ia ashi.
Laisa nodal officer tem dang pei pei district nungi arurtem dang pei amongba takdang merükmejua ayutsü aser parnoki transit camp toktsür aodang disposable bedsheets & pillow covers jungjunga endoktsü shiang ta metetdaktsü.
“Chiyungtsü atema khuret kecha mali aser akokba tashi tajungtiba nung yariteptsü” ta Food Committee Convenor, Avonuo-ia Nodal officer tem dang ashi.