Nagaland State BJP sasep nung mepetmesü angatetteptsü: Y Patton

Kohima, July 1 (TYO): Nagaland State BJP sasep nung mepetmesü ka adoka lir aser state tir melentsü atema takhangba agütsür, ta Nagaland Deputy Chief Minister aser BJP Legislature Party Leader, Y. Patton-i tanü ashi.
Bodbarnü Y Patton’er kidang Nagaland Secretariat Service Association nem protective gears agütsüba sentong ka agiba sülen osangbener den sensaksemdang pai iba osang metetdaktsü.
Nagaland kübok district 10 nungi BJP tirtemi state BJP tir Temjen Imna Along mapa nungi agienang ta züluba shidi ka pa nema agütsüogo, ta Patton-i ashi.
Tawa tu BJP Nagaland nungi district unit tir 10-i BJP National General Secretary (Organisation) in-charge of North East, Ajay Jamwal dang shidi ka nung Imna Along tir menden nungi agientsü takhangba agütsü.
State Returning Officer ajanga Phek district President ji party constitution nung aliba ama shim saka June 23, 2020 nü kuli tejangja kecha melii Along-i pa mapa nungi anendaktsü aser ano pai district president 4 anendaktsütsüba lir, ta district 10 nungi tirtemi shidi nung ashi.
“Nagaland nunga tanga state tem ama nisung ka mapa ka ta asüba inyakyim tangsa tenzüktsüla” ta parnokisa ashi.
Nagaland State President Imna Along-i inyaksangshiba nung taitsü keta lir, ta Wokha, Kiphire, Phek, Kohima, Peren, Mon, Tuensang, Noklak, Aboi (organizational district) aser Zunheboto unit tirtemi shidi nungsa metetdakja liasü.
Iba shidi nungsa State Executive Member nung ajungketba Phek district president-ia sign süa lir.
Parnoki züluba shidiji BJP National general secretary I/c Northeast, Ram Madhav aser Nagaland Dy CM Y Patton naprong nem agütsü.
Iba onük ya tekaratiba nung angatetteptsü ta tanü Y Patton-i ashi.
Shidiji BJP national lennirtem dangi zülu asünung, parnok yakta Nagaland-i arur angatetteptsü, ta paisa metetdaktsü.
Külen, State BJP osang ka ajanga ashiba agi, BJP State Office Bearers (SOB)-i temulung masüba party lennirtem den senden ka amentsü jatepogo.
Iba sendenji Brihostibarnü BJP Party indang Head Office nung amentsü aser State BJP tir madentsü, ta osang ajangasa ashi.