COVID-19 Nagaland: Nisung 500 adenogo; 182 anepogo

Kohima, July 1 (TYO): Bodbarnü Nagaland nung nisung 42 dak COVID-19 putetba züngsema nisung 500 tema kümogo.
“Bodbarnü sample 335 tendangba nungi nisung 42 dak COVID-19 aliba putet” ta Health & Family Welfare Minister, S Pangnyu Phom-i ashi.
Tanü putetertem rongnung Peren Quarantine Centre nungi 31, Phek nungi 8, Kohima nungi 2 aser Dimapur quarantine Centre nungi ka lir, ta pai metetdaktsü.
Dimapur district kübok sorkar quarantine centre nung amonger nisung 14 dak negative putetba züngsema taneptsü angur nisung 182 kümogo, ta Minister Pangnyu-isa shisem.
Health Department-i Nagaland nung COVID-19 puteta aliba district telemsa agütsüba: Peren 114, Kohima -94, Dimapur – 40, Mon – 38, Tuensang- 20, Phek- 9, Zunheboto – 3 aser Mokokchung – 1.
Tanü tashi nung sample 12,268 tendangtsü agütsüba nungi 11,630 indang osang nguogo, ta Principal Secretary Home-i metetdaktsü.
Sample 12,268 nungi 8,070 tashi NHAK nung aliba BSL-3 lab nung tendangtsü agütsüba nungi BSL-3 lab tendangogo aser idak nung jagi 388 dak positive putetogo, ta paisa ashi.
Maneni, Truenat machines ajanga sample 5,669 tendangba nungi 110 nung positive putetba sülen RT-PCR ajanga jangjashitsü yokogo, ta Principal Secretary Home-isa shisem.
Tang Nagaland nung nisung 4408 tashi Facility Quarantine nung mongdar, ta paisa metetdaktsü.