NVCO-i COVID-19 tendangba atema taa magi-i atatsü mepeshi

Dimapur, Chiteni/July 11 (TYO): State sorkari sen crore aika indoka linük nung tesem balala nungi nüburtem anir aruba den, yakbang nungi inyakertemi kanga meranga inyakba ajanga tanga state nungi arurtem timba sorkar quarantine centre aser COVID-19 hospital temi yoktetogo ta shia sorkar nem tenüngsang agütsüba den Nagaland Voluntary Consumers’ Organisation (NVCO)-i state sorkar dang COVID-19 tashidak tendangba atema taa tangsa tangbo magi-i atatsü mepeshia asüngdangogo.
Tensa tamajungbabo küma maoer saka tajungbaa makümer aser state yimtiba nungbo tanga state nungi arurtem toktsür lokti nunga Covid tashidak keta aliba nisung asem pezü dak potetogo. State sorkar aser lokti-i iba tashidak lokti nung prokshia meyoktsü asoshi kanga meranga inyakdar, ajisüaka asüng iba tashidak lokti nung prokshia ora lokti nung tashimait aser sensaker dak iba tashidak tali menaloka aotsü, shirnoki SOP jangjaa malitsü, aser iba mapang tashi nungbo nüburtemi tashidak tendangtsü asoshi sen intoktsü tasak asütsü.
NVCO tir Kezhokhoto Savi-i, iba wara ajanga state senpong nung kanga mejungi kongshiogo, saka tang tashi ano tangalen nungi arurtem anepaludar aser lokti nung tashidak menatepyonga aotsü asenok kishizüng nung lir. Iba amala mapang ka nung tashidak tendangtsü asoshi taa magi, sorkari nüburtem dang pei mulungka nung tejakleni arua angati agi tashidak tendangtsü asoshi ajungshitsüla, ta ashi