Bombay High Court-i school yangkhu touzük atema tetuyuba agütsür

Mumbai, September 23 (Agencies) : School tanurtemi yangkhu taret bener senzüba atema süoki ia bilemja Bombay High Court-i Maharashtra sorkar dang ita ka tsüngda mongin committee kati iba khuret atema teinyaktsü kar ashiba mapa küma inyaktsü tetuyuba agüjang, ta mapang atakzüktsüogo.
Bodbarnü Bombay High Court nung justice VM Kanade aser justice Shalini Phansalkar-Joshi nati ken o ka agizüka angadangba sülen Maharashtra sorkar nem iba tetuyuba agütsü.
School ajak dangi sorkar teteyubaji yoktsüla aser kokrabang school temi kaketshirtem asoshi lockers agütsütsüla. Ajisüaka lockers amshitsübaji kaketshirtem mulung asütsüla, ta High Court Bench-isa ashi.
Government Circular nung school tanurtemi yangkhu nung abentsü seret tasazük dena agütsütsüla, ta Bench-isa shisem.
Government atema okatsür Anjali Helekar-i, “Maharashtra nung school lakh 1,65,495 shi lir aser parnok dangi osang yoktsü asoshi mapang agitsü” ta ashi, saka Justice Kanade-i, school ajak website lir anungji email yoktettsü, ta langzü.
Social activist Swati Patil-i High Court nung school tanurtemi school yangkhu taretba-taretba abener aser iba ya ajanga tanurtem temang nung timtem bener arutsür ta PIL ka benok.
Iba ken o benokba sülen sorkari luden ka shima mapa nungloktsü aser parnoki iba khuret atema teinyaktsü aika shidangogo.
Sorkari shimtetba luden ajanga ashiba agi, parnok arishi küm nung abentsü touzük den meputepi kaketshirtemi school yangkhu shilem 20-30 agi taretba abener.
Iba ya ajanga arishi küm 10 teküpok kaketshirtem orthopaedic ajanga timtemer, ta ludenisa metetdaktsüogo.
Luden-isa, subject shia atema kaket kaji ita asembo amshitsüla aser textbook indang touzük ajema kümdaktsütsü asoshi paper tepongba aser hardcover malitsüla, ta metetdaktsüogo.
Parnokisa, school nung e-classroom, audio-visual technology aser tanü-asüng lesson sayuba yimya tasentem amshi junger ta shidangogo.