COVID-19 Nagaland: Nisung ajak agi 748 kümogo

Kohima, July 11 (TYO): Honibarnü Nagaland nung nisung 16 dak COVID-19 putetogo aser parnok züngsema nisung ajak agi 748 kümogo.
“Tesüiba ghonda 24 tsüngda sample 310 tendangdang nisung 16 dak COVID-19 aliba putet” ta Health & Family Welfare Minister, S Pangnyu Phom-i metetdaktsü.
“Tanü putetertemji Kohima nungi 7, Tuensang nungi 5, Mon nungi 3 aser Mokokchung nungi 1 lir” ta paisa ashi.
Tuensang district nungi nisung 9 dak tendangdang negative putet aser tang tashi nung nisung 313-i taneptsü nguogo.
Nagaland nung COVID-19 puteta aliba district telemsa: Dimapur – 240, Peren – 216, Kohima – 153, Mon – 76, Tuensang – 41, Phek – 13, Zunheboto – 4, Mokokchung – 4 aser Wokha – 1.
Tanü tashi nung taneptsü angurtemji Dimapur nungi 158, Peren nungi 76, Kohima nungi 59, Tuensang nungi 16, Zunheboto nungi 3 aser Phek nungi 1 lir.
Tanü tashi nung RT-PCR ajanga sample 16,037 tendangtsü agütsüba nungi 14,971 indang osang nguogo. BSL-3 lab, NHAK nung sample 10,381 aser BSL-2 lab, CISHR nung sample 9,889 tendangba nungi sample 532 nung COVID-19 putet.
Külen, Truenat machine ajanga sample 89, 371 tendangba nungi 8,817 negative aser 264 positive putet aser itemji RT-PCR ajanga jangjashitsü agütsüogo.
High Powered Committee (HPC) on COVID-19-i Nagaland nung COVID-19 wara anema raraba asoshi Standard Operating Procedure (SOP) ka dang alitsü telemtetba agiogo, ta Minister Neiba Kronu-i ashi.
SOP aser teinyaktsütem latetba mapa tenzükogo saka jungjunga shisadanga yanglutsü asünung mapang tatsüka agitsü, ta paisa ashi.
SOP tasen magütsü tashi tang benshia aruba SOP aser lockdown tetuyubatem mapa küma inyaktsü, ta Minister Neiba-isa metetdaktsü.
Yashi HPC senden nung Nagaland nung government facility mesüra quarantine centre tem indang onük benoka lemsatep aser idangji sorkari lapokba quarantine centre tem nung sen terara agüja mongdaktsütsü telemtetba agi, ta paisa metetdaktsü.
HPC-isa sorkar mozü kitem nung COVID-19 tendangba atema sen agitsü telemtetba agiogo, ta Minister Neiba Kronu-isa shisem.