Tuensang district nung senzüsenpongtsü tetuyuba agütsü

Dimapur, Luroi/August 3 (TYO): July 28 nü COVID-19, Tuensang District Task Force (DTF) senden nung, lokti nung COVID-19 tashidak prokshia aotsü ana nung aliba asateta Tuensang district-i gari/nisung aruba meita atatsü asoshi telemtetba agiba dak ajemdaker Deputy Commissioner (DC) Tuensang, Kumar Ramnikant IAS-i, district ka nungi kati senzüsenpongba dak sendakba nung Operating procedures (SOP) metetdaktsüogo.

1. Nüngdak tongtibang ka melira osang tejangja ka magütsü tashi Tuensang nungi aotsü aser arutsü temelaba magütsüi atatsü.
2. Medical aser asüama amala jongdak maparen balala atema senzüsenpongertem ajak COVID-19, Tuensang DTF nungi temelaba agirang senzüsenpongtsü.
3. Sorkar tenzükertem shirnok mapa asoshi Tuensang district-i arutsü ali, parnok maru tsüngda ghonda 24 jelia Hod temi DTF nem osang agütsütsüla.
4. Sorkar tenzükertem dak alaker nüburtem shirnoksa Tuensang district-i arudir, parnoki pei district nungi temelaba agütsüba kuli tejangja sayuba sülenang district-i aittsü melatsü.
5. District-i maitsü tsüngda senzüsenpongertem indang osang tejangja Inter district check gate nung bendena ayutsü.
6. Sorkar tenzüker/ agencies shirnok tanga state nungi district-i arudir, parnok ajak COVID-19 tashidak tendanga tashidak mali ta jangjaba sülenang mapang nung sotaka inyaktsü melatsü.
7. Sorkar tenzükertem dak alaka shirnoksa district-i arudir parnok ajak anogo 14 kidang quarantine asütsü.

Temalen shisema aliba inyakyimtem takok ngua benoka inyaktsü asoshi Tuensang COVID-19 WAR ROOM den item number; 03861220171/6009964361/8131926612/ 8132039124/ 6033862540 ajanga anepdang 10:00 ako nungi nikongtsütsü 4:00 ako tashi tongteprateptettsü.