Dimapur ya asen lima

Joko Nagaland nung Covid-19 tashidak keta alir nisung meyirijang ana dak tali putetogo aser nisunga asü tenzükogo. Itemji Dimapur nung atalokba aser putetba teimba, anungji tanü nungibo Covid Hospital Dimapur nungbo Covid tashidak putettertem yipten agi mata kümogo. Ano, tebilemtsü kaji tashidak putetertem rongnungji kanga shirangertema lir, anungji asenok tia mejungra, memenui Covid Hospital Dimapur nung yipten agidang masü saka oxygen ventilator machine agia maku rakteptsüsa adoktsü. Iba amai Nagaland nungsa süaka, Dimapur nungang tashidak tepoktetba aser nisungtem teshirangba saka mozü ki anepalurtembo mali ta angudang, Dimapur nung ya Naga nunger ajak alir ser nung kibur maliba lima ama kümdaktsüogo ta temulung animesüngzükteti bilemer. Naga nunger kin aser yim ajak nungi Dimapur nung arua senso küma alir aika lir. Itemji joko kodanga pei tsürabur yim bushia maotsü. Parnok aser parnok chirnurtem ajak Dimapur senso kümogo, anungji temanga Dimapur nung dang aremtsü. Ajisüaka, item Dimapur senso purtem jagi Dimapur ya bendang lima ama bilemer. Ashiko, iba amaji talibo Dimapur nung senso küma alir ser nung bendang lima amai bilemba agi, Covid-19 wara ama, tashidak wara tesashi agi amokmerenaka Dimapur Covid Hospital tia shingaia süoki ia mebilemer südi. Dimapur atemabo tashidak tendangtsü atema aruba machine dena Government Covid Hospital nung masü saka tanga mozü kidangang amenok aser iba machine nung nüngdakba dena malitet akümba agi tashidak metendangtet nisungtem kodamasüba tia ajuru tenzükogo. Iba ama mapang ka nung Dimapur nung telidak sensosangertemi dang masü saka Nagaland kübok tesem balala nung alirtemi dena Dimapur Covid Hospital nungbosa nisungtem tashidak tendangba machine shitak alitsü aser nisung noklang ishika atemabosa yipten zep ta renema alitsüsa government nem takangba agütsütsüla, kechiyong Nagaland kübok district ajak nung Covid mozü ki liaka, tang Dimapur nung amai nisung meyirijang ta masüyonga noklang dak tema puteta koda masü shirang tenzükra, idangjibo Dimapur-i belentsüsa adoktsü. Iba ama tia tamajungji matalokia ataloktsü ama asenok nükla nung ngua shisabolua renemtsüla. Atangji, iba ama mapang ka nung tanga lokti tentettem den ano Ao Senso Telongjem Dimapur-ia dena Dimapur nung District Covid Hospital shitak ayutsü asoshi nüngsen agia government nem takangba agütsübaji Dimapur nung kiburtemi ola adoker asütsü. Dimapur ya shinga kin aser kidong jurila indanga masü, iba lima ya Naga nunger ajak nem Tsüngremi moatsüba lima ka lir. Asenoki dang teinyak shia inyak nungbo Dimapur kija nung aluyimba aser inyakba agi Naga nungertem ajak chiyonger aser agir anüngtsüsa züsentettsü. Iba lima nung Aortem ya kilir masü saka kiburtem lir, anungji khuret tulu lir. Joko, Aortemi kibur kümküma shisatsü, nübo aser rongsen agi Dimapur lima ajungtsü asoshi inyak tenzüktsüla. Aji oda, Dimapur district kübok aliba Ao Senso telongjemtem aser Aor yimtsüngtem ajaki pei pei alidak kibur kümküma nübo aser rongsen endok mesasai Dimapur ajungtsü asoshibo asen pi ta mesükshii nüngsena agitsüla. Kilirtem dangbo kibur khuret tuluba aser kilirtem dangbo kiburtemiang pei lima temeimba asütsüla. Aji oda, Dimapur district nung pei alidak Aor arogotem aser Aor telongjemtem kar jubilee mongra, iba tenüng nung Dimapur nung long kabo azünga Dimapur meraketdaktsütsüla. Alima ka madak kibur akümtsübaji saru saruba agi mesüra tangari anibelem aser nüngsen agia renema yutsüba nung ayongayong oa tagitsü aser tajangzük arudang raktepa agiba agi masü saka asenoki inyakba nung tangar anisüngzükdaktsüba ajanga dang nümadangdanga kibur kümtettsü. Aji oda, Dimapur nung Aortembo Dimapur atema aruba chitsürtem masü saka Dimapur atema agütsürtem asütsüla. Iba ama tenla jagi dang Dimapuri Aortem dang sakloka kibur ajatsü.