CIHSR nung billing staff teimba ka dak COVID-19 putet

Dimapur, August 3 (TYO): Dimapur nung aliba Christian Institute of Health Sciences & Research (CIHSR) nung billing staff ajunga dak amai COVID-19 putetogo aser iba jagi mozü ki shibang, ta Dr Sedevi Angami-i ashi.
“Onok staff 25 shi dak COVID-19 putetogo saka parnok teimba dak shirangba yimya mali aser lanur dang asü nung kanga kara taneptsü angur. Onoki staff taintembo kidang dang mongdaktsür” ta Dr Sedevi-isa ashi.
“Onoki parnok dak August 14 nü tendangtsü aser iba sülen August 17 nungi mozü ki lapoktsü merangtsü. CIHSR nung Covid putetba sülen taneptsü angurtemi Covid isolation ward nung mapa inyaker aser iba jagi parnoki radiation PPE suits magii mapa inyakteter,” ta paisa metetdaktsü.
CIHSR nung inyakertem dang COVIDD-19 nungi jenbua alitsüba aser tesayuba balala agüja aruogo saka taruba anogo ishika tsüngda onoki staff aika dak tendangtsü. Hopta ana sülenbo ozü staff temi tetsübu kecha malii mapa inyaka otettsü, ta Dr Sedevi-isa metetdaktsü.