DC Kohima aser ketdangsertem den tepila sentong ka agi

Dimapur, Mongputeni/October 09 (TYO): Mapa yutsür Deputy Commissioner, Kohima, Gregory Thejawelie NCS, EAC Changsang aser SDO (C) Alemyapang Longchar nunger nem akhum agüja tepila sentong ka DC indang Conference Hall, Kohima nung October 9, 2020 nü agia liasü.
Deputy Commissioner mapa nungi anensang, Gregory Thejawelie-i tepila o jembiba mapang Kohima district nung nüburtem tenzüktsü atema maongka agütsüba asoshi state sorkar dang pelaba ashi. Ketdangsertemi yariba aser kati ka den angatettepa inyakba ajanga management system, law & order aser talisa tashidak wara agi tesem ajunga sünger aliba mapang maparen ajak nung tajungtiba agi inyaktetogo, ta pai ashi.
Mapang tatsüka Kohima indang Deputy Commissioner inyakdang aika angazükogo aser tajangshibatem jangratema bilemer, ta pai ashi. COVID-19 den raraba mapang district ketdangsertem aser line department temi shilem tajung agiba atema pelaba paisa shisem aser tarutsü anogotem nunga maneni ka kuma lungjemer inyaktsü ayongzüka liasü.
Gregory ya Nagaland Civil Secretariat nung Additional Secretary, Power mapa inyaktsü.
Kasa sentong nung mapa yutsür aor SDO (C) Jakhama, Alemyapang Longchar aser EAC Kohima, I. Changsang natia tepila o jembia liasü. Alemyapang ya SDO (C) Athibung ama transfer aor aser Changsang ya Panso nung EAC inyaktsü.
DC Office indang ketdangser aser staff tem tenüng nung SDO (C) Estb. Daniel Angami ajanga jembi aser CMO Kohima, Dr. Vezokholu-ia jembia liasü.
Iba sentong nung ADC Kohima, Lithrongla Tongpi Rutsa menden liasü aser Rev. Vicavor Krose, Director, ABCCTK ajanga Tsüngrem temoatsü jazüka sarasadem. Maneni SDO (C) Sadar, Shaying Sheu-i tepela ankep o jembi.