PHC Athibung nung Semi-Auto Analyzer Machine semzük

Dimapur, Mongputeni/October 09 (TYO): Advisor, Water Resources Department, Namri Nchang-i Athibung block ajunga atema Primary Health Centre Athibung Town nung October 09, 2020 nü Semi-Auto Analyzer Machine ka semzükja liasü.
Iba Semi-Auto Analyzer Machine semzükba sentong nung jembiba mapang Advisor-i PHC Athibung nung inyakertem nem tenüngsang agütsü, shirnoki yangji aliba nübur asoshi ani-belem mesasai inyakyim nung temolung agüja inyaka arur.
Iba sentong nung adenertem dang iba machine timi amshitsü atema pai Athibung Town nung alir medical staff den amalitep akatsü ajungshi aser Athibung nung nübur atema MO in charge ajanga iba machine nung temang reprangtsü asoshi sen latettsüba shidak agütsütsü ayongzüka liasü.
Nübu, takotet nübu aser medical hadirtem peria meliaka nüburtem nem healthcare service tajungtiba nung agütsütsü nükjidong nung akaba yari inyaker, ta Namri-isa ashi. Maneni paisa medical staff tem dang tali bendanga agütsür nübur nüngdakba peritsütsü ajungshia liasü.
Tetenzük nung tang tashi Advisor-i nübu aser rongsen agi timtem ajak nung yaritepba atema Medical Department aser District Administration ajanga pelaba lemsatep.
Iba sentong nung Advisor meina District Administration nungi Deputy Commissioner, Peren, Sentiwapang Aier (NCS) tekolakba sür Medical Department aser police tem dena liasü.
Iba sentong nung Temsumenla Kipgen, BPM, Athibung Block menden liasü, aser DC Peren, Sentiwapang Aier; Dr.Supongmenla Walling, DTO, RNTCP; L.L Kuki, President Kuki INPI aser Dr.Thangmang Thomsong, MO I/C Athibung PHC nungertemia o tatsütsü jembia liasü. Iba machine meshiteta Rev. K Singsit-i sarasadem aser Legit Singson, vice chairman, Athibung Town ajanga tepela ankep o jembia sentong tembang.