COVID-19 anema nüburi nokdakba nung state nungi tejangja nisungtemi nungiter

Dimapur, Mongputeni/October 09 (TYO): COVID-19 den raratsü atema Ato Kilonser Narendra Modi-i public movement ka tenzüktsü ayongzükba nung telangzüba agüja Nagaland nungia tejangja nisungtemi nüburtem dang COVID-19 atema yimya shidak amshitsü aser maneni pei sasa pei kumzüka ayutsü atema mepishir.
Brehostibarnü Twitter nung “Jan Andalon on Covid Appropriate Behaviours” sentong sayaba mapang Ato Kilonser Modi-i linük nung aliba nüburtem dang iba virus atema taneptsü ka mongutet tashi iba tashidak nungi jenbua alitsü meratem kanga junga amshitsü mepishia liasü. COVID den raraba nung nübur ajungai shilem agitsü nükjidong nung iba sentong ya tenzük.
Nagaland nungia “Tetseo Sisters” kentener telok nungi Mercy Tetseo-i nüburtem dang maneni face mask amshitsü, mapang shia teka shidoktsü aser physical distance yimyatem amshitsü ajungshu. Linük nung lockdown tanemi salaba mapang nüburtem coronavirus nungi jenbua alitsü imlar, ta lai ashi.
Osangbener aser kaket zülur Vishu Rita Krocha, shibai kidang nungi PenThrill ta nüngja agüja aliba publication ka lapoka alir, laia iba tashidak den raraba nung asenoki takok angutsü, ta tamang katetba olen ka lemsatep. Laisa nüburtem dang “Do gaj ki doori” aser danga safety measure yimyatem amshitsü ajungshi.
Taoba Miss Nagaland, Ruopfuzhano Whiso-i ashiba agi, tesem ajungalen iba tashidak prokshia aoba metembang asünung nüburtemi maneni iba tashidak nungi kumzüka alitsü yimyatem amshitsüla aser chiyongtsü tajung achitsüla.
Linük nung talenba/tenokdangba balala sala tenzükogo aser nüburtem temai adok tenzüker, anungji teka müreka aliba, mask agiba aser social distancing amala COVID-19 nungi jenbua alitsü yimyatem asen molung nung teti alitsüla, ta Kohima Press Club tir, Alice Yhoshu-i ashi.
“Abogenesis” telok nungi Arenla Subong-ia nübur dang lokti tulu madenshitsü ayongzüka liasü.
Kasa telok nungisa Moa Subong-ia, “Tang iba tensa nung takum libalirutsü tera tasakba kümogo. Saka ajaki süoki ia merangdangba ajanga iba tashidak wara amadak takok angutsü,” ta ashi. Paisa nüburtem dang kilung nung alitsü aser nüngdakba mapang dang kimai adoktsü ajungshia liasü.
Kasa mapang Ministry of Information and Broadcasting kübok aliba Press Information Bureau Kohima, Field Outreach Bureau Kohima aser All India Radio Kohima nung inyakertemi pei pei office nung Jan Andalon aser COVID-19 anema raratsü tenangzükba agia liasü.