DNSU-i 5 AR dang pelar; Sorkar dang NLTP Act meyipa reprangshitsü nenshir

Dimapur, October 9 (TYO): 5 Assam Rifles-i September 2 nü Dimapur kübok 7th mile nung liquor bottling plant aser September 29 nü 5th mile nung yi aika apuba atema tenüngsang agütsür, ta Dimapur Naga Students’ Union (DNSU)-i metetdaktsü.
Iba tatalokba ana ajanga Excise Department-i mapa shitak meinyakba jungkai adoka sayur, kechiyong iba department yagi Nagaland Liquor Total Prohibition Act, 1989 ketdangsüa inyaker, ta DNSU-i sangdong ka nung ashi.
“Excise Department-i mapa shitak meinyakba ajanga ozüngi memelaba yi ayokdak aikati tema nung yi ayoker. DNSU-i lokti asoshi tebilemtsü khuret abenba telok ka ama, mapang kar nung ozüng amertem mapa inyakogo aser iba mapang ozüng alema yi shibelena ayoker kar apu aser ozüng amertem dang kasa mapa inyaktsü ayongzükogo. Saka, ozüng alema yi shibelenertemi ozüng amertem metsübui dang otiotia mapa inyaker aser asen lima nung yi talubosa angur. Künü anogo Nagaland nung aliba ayong aser ayongnu ajak nung tzü akongtsü akok saka yibo kodanga mekongi dang ayimtsü” ta Media cell sangdong nung ashi.
State sorkari NLTP Act 1989 ya jungjunga shisadanga reprangtsüla aser yi noktanga aliba salatsü mesüra ozüng takangba alenshitsü atema telemtetba agitsü ayongzüker, ta Dimapur Naga Students’ Union (DNSU)-isa metetdaktsü.
“Dimapur nung ozüng alema yi ayokba magizüker aser iba anema onoki mapa inyaktsü. Anungji, bangdak ketdangsertemia iba maparen atema tali nendaka aser süoki ia bilema inyaktsü ayongzüker” ta parnokisa ashi.