Chakhesang Yout Front tenteter küm 25 jungogo

Dimapur, Yimpoksüi/Nov. 20 (TYO): Phek town nung “Retrospect and Revive” omen nung ajemdaker The Chakhesang Youth Front (CYF) pur küm 25 ajungba jubilee mung November 20, 2020 nü mungogo.
Iba sentong nung alakteta jaoker ka ama jembiba mapang, tawa lenmang yanglutsü project kar agizükba sülen kobi melie Nagaland nung aliba lenmangtem rongnung tajungtiba Phek district nung angutsü, ta Minister, Planning and Coordination, Land Revenue & Parliamentary Affairs, Neiba Kronu-i ashi.
Kohima nungi Pfutsero ajanga Jessami tashi 2 Lane lenmang ya December ita tashinung tenzüktsü. Danga lenmang yangluba project ana, Phek nungi Chozuba aser Lozaphuhu nungi Myanmar den arrtsü nung aliba Avangkhu tashi, sorkari agizükogo, ta pai ashi.
Item lenmang yangluba maparen renemba sülen nüburtem indang rongsenketsünga tajungba akumtsü, ta Kronu-i ashi. Maneni Tizu valley nung 24 MW Power Project atema DPR renemba mapang lir.
Aluyimba tsütsü Phek district nung janga junga inyaktettsü, aser iba dak sendakba nung aluyimer temi züsentetba danga district tem nung yoktettsü atema marketing linkage tem amenoktsütsü, ta pai ashi.
Phek district nung terenlok mapa takok ngua inyaktsü atema Chakhesang lokti tentet temi amalitep alitsü pai ayongzük.
Paisa nüburtem dang district nung terenlok mapa nung tetsükdaktsü majurutsüsa yimya tajung amshia lungjemer alitsü ayongzüka liasü.
Tetushi tesemdanger ka ama jembiba mapang MLA Kuzholuzo (Azo) Nienu-i CYF tenteter nem akhum agütsü, koba Chakhesang kin indang temeden wazüka ayutsü atema 1995 küm tenteta liasü.
Paisa lanurtem dang mapa meranga inyaktsü aser pei sasa pei dak metaloka aser peria alitsü ayongzük.
Asenoki dangar dak metaloka aliba ajema kumdi aser meranga inyaka jangratema leti, ta pai ashi.
Pai lanurtem dang mapa meranga inyakba yimya sübatsü aser azümesen samadaktsütsü ashi.
Azümesenba agi asenok kongia manitsü. Tetoktepba agi sünga aliba lima nung azümesener ajungdak mali, ta pai ashi.
Tesüiba mapang lanurtem rongnung CYF ajanga terenlok bener aruba nung shilem tajung agia lir aser yamaji tarutsü anogotem nung shilem tajungba agitettsü teimla lir, ta CYF tir, Lhuvesayi Lohe-ia iba sentong nung ashi.
Sentong nung Chakhesang Public Organization (CPO) tir, Mikha Kenye-i CYF silver jubilee nüngo kaket sayatsü, Vetsiirayi Tetseo-i iba sentong ani aser Nyitso Therie-i tepela o jembia liasü.