Nagaland Money Lenders Act 2005 indang Doordarshan Kendra nung angutsü

Dimapur, Yimpoksüi/Nov. 20 (TYO): Kohima District Legal Service Authority ajanga November 19, 2020 nü Doordarshan Kendra Kohima den lungjemer Nagaland Money Lenders Act 2005 onük nung sensaksemba record süa liasü, kona ita shia legal awareness balala inyakba nung shilem ka lir.
Iba sentong nung panelist ya Joshua Sheqi, Advocate Gauhati High Court, Kohima Bench, Apila Sangtam, PL aser Vimeno, PL nungertem liasü.
Parnoki asen state nung Nagaland Money Lenders Act kobaser benok aser license agütsüba ketdangser nungi sen aputsür temi komaser license agizüktsüla, item indang nung rangloker jembi.
Parnoki inspector ka shilem indanga jembi, shiba licensing Authority ajanga shimer. Maneni parnoki sentong indanga jembi, koba küm nung shilem 3 lir, aser NML Act nung agüja aliba ama sentong nung aibelener nem temerenshi agütsütsü indanga jembia liasü.
Iba sentong ya Doordarshan Kendra, Kohima aser YouTube nung November 22, 2020 nikongdang 5:30 ako nung sayutsü.