Kronu aser Tovihoto nati Poilwa nung power project semdang

Minister Neiba Kronu aser Advisor Tovihoto Ayemi den Power department ketdangsertemi November 19, 2020 nü Peren district kübok Poilwa nung aliba Dailum-Roi Mini Hydel Project semdangba noksa nung angur.

Dimapur, Yimpoksüi/Nov. 20 (TYO): Minister, Planning and Coordination, Land Revenue and Parliamentary Affairs, Neiba Kronu aser Advisor, Power, Tovihoto Ayemi na den power department nungi ketdangsertemi November 19, 2020 nü Peren district kübok Poilwa yimtsüng nung Duilum-Roi Mini Hydel Project tang asendenshia teyangludak aliba semdanga liasü.
Anentsüh tulu alua main channel raksatsüba sülen iba project ya 2019 küm August ita nungi mamshi arua liasü.
Iba tesem nung adenshia alirtem den jembiba mapang, Kronu-i ashiba agi, terenlok mapatem nung power aser electricity ya tongtipangtiba lir.
“Asenok lenmang tajung den power lira, danga terenlok mapatem anidaktsü,” ta pai ashi.
Power department arakzüdaktsütsü mechi state sorkari state nung power project balala atema 15th Finance Commission nung sen crore 1115 jenjang project tem yanglu, ta Kronu-i ashi.
Central sorkar teyari, FDI mesüra Asian Development Bank nungia süang, PDA sorkari maneni power project tem nung temolung agütsütsü, aser Upper and Lower Tizu aser Tizu valley nung power project tulutem atema proposal benokogo, ta pai ashi.
Department-i Duilum-Roi nung aliba Mini Hydel Project ya 2MW tashi tuluba kuma yanglushitsü atema sentong yangluba asoshi takoktsü lenmangtem kanga junga asameyanger sorkar den jembitsüla, ta pai ashi.
Tzü source tajung aliba rongnung Poilwa ya ka lir, anungji Poilwa aser Khonoma yimtsü dang parnok tsüngta mangatetep aliba angateteptsü mepishir, aser ibaji ajanga dang state yimtiba nung water supply atema sorkari sentong yanglua aliba ataloktsü, ta Kronu-i ashi.
Iba atema state sorkari yimtsüng ana tetsüngtai ia jembitsü asoshi nübu yoktsü molunga lir, ta pai ashi.
Tang aliba sorkari terenlok mapa jenti inyaktsü nükla lir aser power project tem asendenshia yanglushiba maparen maneni inyaktsü, ta Advisor Tovihoto-ia ashi.
Ajisüaka Nagaland nung ali aser ali rongsen ya yimdaklir molung asünung ali kibur teyari aser amalitep nungdaker, ta pai ashi.
Additional Chief Engineer (T&G) Penrithung Yanthan-i ashiba agi, Duilum-Roi Mini Hydel Project koba 1991 nung tenzük, iba ya stage ana lir, koba mezüngbuba 540 KW aser tanabuba ya 200 KW lir.
Iba project ya palaka amshitsü aser temeket nung aliba yimtsüng tem nem electricity agütsütsü atema yanglu, ta pai ashi.
Ajisüaka department-i stages ana ya tasen kuma yanglushitsü benok aser ano 2.4 MW tashi agütsütetba plan tasen ka amenoktsü sentong yanglu, koba grid den sendakteptsü, ta Penrithung Yanthan-isa ashi.
Iba atema DPR renemer state sorkar nem proposal agütsüogo aser iba project yagi küm shia electricity 11.95 MU tashi agütsütettsü, ta pai metetdaktsü.
Engineer in Chief, Shikato Sema-i ashiba agi, iba amala project ajanga department ket nung aliba resources tem amshitsü meranger.
Iba sentong nung Poilwa Village Council chairman, Namkwa aser Heinumbe village council chairman, Heinumbe nungeria jembi aser akok tashi yariteptsü, ta shia liasü.