Wokha nungi Riphyim tashi NST Bus service tenzüktsüogo

Wokha, Yimpoksüi/November 20, 2020: Hokolbarnü, NST office nung Deputy Commissioner, Orenthung Lotha-i Wokha nungi New Riphyim tashi bus service tenzüktsüba mapang agiba noksa ka yangi angur.

Wokha, Yimpoksüi/November 20, 2020 (TYO): Hokolbarnü (20.11.2020) Wokha district kübok Nagaland State Transport Office nung, Deputy Commissioner, Wokha, Orenthung Lotha-i Wokha nungi New Riphyim tesem tashi NST bus service tasen tenzüktsüogo, ta sangdong ka ajanga metetdaktsü.
Deputy Commissioner-i, iba bus service tenzüktsüba ajanga New Riphyim nung alir nüburtem dang masü, saka tsükong (range) ajunga, kong yimtsüng trok tashi lir, item yimtsüng nungi sensopur ajak atema anisüngzük asütsü, ta ashi. Nüburtemi timtem ajuruba pungbadaktsütsü atema Sorkari public transport system ajanga nübur nem iba service agütsür, ta DC-i metetdaktsü aser iba service ajanga ajak ajangzüktsü atema New Riphyim nung alirtem dang pei indang ama anepalua amshitsü asoshi pai ajungshia liasü.
New Riphyim nung nüburtem nüngdakba ajiteta, Dy. Chief Minister, Minister for Home and R&B, Yanthungo Patton aser tanga ketdangsertemi iba service tenzüktsüba atema DC-i parnok danga pelaba metetdaktsü.
COVID-19 mapang tanga tesem balala nungi arurtem (returnees) aser pei pei talidaki moteti alirtem pei talidaki (district) meinoktsütsü atema bus service agütsüba asoshi DC-i NST Department dang alakteta pelaba shisem.
Iba bus service tasen tenzüktsüba sentong nung, Divisional Manager NST, Konia, Visio Yepthomi-ia, bus service talila ka bendenloktsüba ajanga district nung terenlok maparen ka ajangzüktetogo, ta ashi. Nüburtem nem nüngdakba service tajungtiba agütsütsü atema ajaki department den longjemer inyaktsü asoshi pai mepishi.
Nübur nüngdakba ajitetta 32 sitter bus service tenzüktsüba asoshi New Riphyim aser Old Riphyim yimtsüng tenüng nungi tekolakpurtemi Dy. Chief Minister Y. Patton, Transport Minister Paiwang Konyak aser General Manager Nagaland State Transport danga pelaba metetdaktsüogo.
Wokha nungi New Riphyim tashi nüburtemi taa dalang agütsür senzüsenbongtsü atema Nagaland State Transport department-i 32 sitter bus service tenzüktsür. Kilometer 22 tashi ayimjema iba lenmang tasen nung bus service senzütsü aser Wokha nungi service NO.519 Up aser New Riphyim nungi service NO.520 Down alitsü. NST Bus service tasenba ya Hokolbar nungi tenzüktsüogo.
Kasa sentong nung Divisional Manager NST, Kohima, Yepthomi-i, tang tensa asadanga bus nung passenger shilem 50% dang senzüsenbongtsü aser iba inyakyim nung anidak tashi bus para sen 60/- agitsü, saka tensa süngjema akümdanga bus par sen 40 agi alutsü. Anogoshia, iba bus ya anaben senzütsü, ta metetdaktsü.
Iba bus service metenzükdang, Wokha Town Baptist Church, Pastor, Rev. Abemo Jungio-i bus meshiteta sarasademtsü, ta kasa sangdong nung shia lir.